CHOʼQ REHEBʼ LI SUMSUKEBʼ
1. Xkʼebʼal xwankil li sumlajik
KʼARU NARAJ XYEEBʼAL?
Ebʼ li sumsukebʼ li nekeʼxkʼe xwankil li xsumlajik chʼolchʼo chiruhebʼ naq maaʼani tjachoq rehebʼ. Ut aʼin naxbʼaanu naq sa teʼrekʼa ribʼebʼ. Nekeʼxnaw naq maakʼaʼ naxye li kʼaru tkʼulmanq junelik wanqebʼ saʼ junajil.
Wiibʼ oxibʼ rehebʼ li sumsukebʼ toj wankebʼ saʼ junajil xbʼaan naq nekeʼmineʼk ru xbʼaan ebʼ li xjunkabʼal ut ebʼ li ramiiw. Abʼanan, li kʼaru raj tjunajinq rehebʼ aʼan li rahok ut li oxloqʼink.
LI NAʼLEBʼ LI NAXKʼE LI SANTIL HU: «Li bʼeelomej mixkanabʼ li rixaqil» (1 Corintios 7:11).
«Wi nakaakʼe xwankil li sumlajik aʼin tixbʼaanu naq inkʼaʼ tatjosqʼoʼq saʼ junpaat. Joʼkan ajwiʼ, tixbʼaanu naq inkʼaʼ tchʼaʼajkoʼq chaawu xkuybʼal xmaak chi moko taawil ebʼ li chʼaʼajkilal joʼ jun xyaalal re xraqbʼal laasumlajik» (laj Micah).
KʼAʼUT WANK XWANKIL?
Li sumsukebʼ li inkʼaʼ nekeʼxkʼe xwankil li sumlajik, naq nekeʼxkʼul jun li chʼaʼajkilal nekeʼxkʼoxla naq jalan peʼ raj li xsumʼaatin keʼxsikʼ ut nekeʼraj xraqbʼal li xsumlajik.
«Naabʼal rehebʼ li nekeʼsumlaak ak wank saʼ xchʼoolebʼ xraqbʼal li xsumlajik wi inkʼaʼ us nekeʼelk. Wi ak wank saʼ aachʼool aʼin naq nakatsumlaak aʼin naraj xyeebʼal naq moko taakʼe xwankil laasumlajik» (Jean).
KʼARU TATRUUQ XBʼAANUNKIL?
KʼOXLA RIX AʼIN
Chanru nakatnaʼlebʼak naq nakaachoqi aawibʼ rikʼin laasumʼaatin?
-
Ma nakaakʼoxla naq inkʼaʼ raj xatsumlaak?
-
Ma nakaakʼoxla naq us raj laayuʼam wi rikʼin jalan raj xatsumlaak?
-
Ma nakaaye «tatinkanabʼ» malaj «ok we xsikʼbʼal jalan chik li t-oxloqʼinq we»?
Wi xaakʼulubʼa wiibʼ oxibʼ rehebʼ li patzʼom aʼin, aʼan aʼin li hoonal naq taakʼe xwankil laasumlajik.
AATINAN RIKʼIN LAASUMʼAATIN
-
Ma inkʼaʼ chik nakaakʼe xwankil laasumlajik? Wi joʼkan, kʼaʼut?
-
Kʼaru tatruuq xbʼaanunkil re xkawubʼresinkil laasumlajik?
LI TATRUUQ XBʼAANUNKIL
-
Tzʼiibʼa wiibʼ oxibʼ li uutzʼuʼujinbʼil aatin re laasumʼaatin re xkʼutbʼesinkil naq nakaara.
-
Wanq junaq xjalam u laasumʼaatin bʼarwiʼ nakatkʼanjelak.
-
Bʼoq laasumʼaatin rajlal naq wanqat saʼ laakʼanjel malaj naq xaakanabʼ xjunes saʼ xkʼabʼaʼ naq xat-elk chi bʼihajik.
LI NAʼLEBʼ LI NAXKʼE LI SANTIL HU: «Li xlaqʼabʼahom li Yos, maajun chik taajachoq re» (Mateo 19:6).
