Pɔnɔɔ a lanɔ cho loo o lediom nda che nɔ ndaa ma nyɛ cho le fafɛɛŋndo o cho ni. Nduyɛ, hei tosa wana o wana kiisaŋ a chaaŋ ndɔ le. Mi nda ŋiɔɔŋ kpou nɔ tiindaŋndo maa mɛɛ mɛɛ bahawɛilaŋ la wa, a cho lo diompilɛ o nɔ ndaa niŋ.

Mi wanaa cho o nɔɔ niŋnda apum kɛɛsiaa le loo diompilɛ le nyɛ chaaŋaa ndaa, ɔɔ wanayaŋ ndaŋ cho dimi a nda okɔɔ wo. Kɛ i hiou bɛnda kpou ve cho ni, loo diompilɛ o nɔ nyaa niŋ le mɛɛ nya kaaliaŋ, nduyɛ mi la nɔ bɛɛleŋ vellaa velle yɛ.

SAWA MANDAA BAABUIYO: “Pɔnɔɔ . . . nɔ mbo piɔuwaŋ nda laa ndɔ le.”—1 Kɔliŋtiaŋ 7:​11.

“Te wana lo o lediom o nɔ numndo niŋndo ŋ cho ni, a ve wana dɔunuŋ tumbe chɔchɔ le. A nɔ ma wa wana malaa haki chɔchɔ, nduyɛ ma keleŋa nyɔɔlu. A chɛl mi bahawɛi kɛ kɛ piɔu nya tɛɛŋ o nɔ nyaa niŋ te.”—Makal.

Te bahawɛilaŋ la komal pɛ wanaa lo o lediom o nɔ ndaa niŋ te wa, haupa ma dimi aa, ‘Naa num ŋ sul chiɛiniŋ naŋ te.’ Okoŋ ma kandu nɛilaŋ nuuviaa le kɛyaŋndo.

“Mi wanaa bɔɔbɔɔ chal o nɔɔ niŋ a yiyaŋndo o kɔl maa, te sɔɔŋ bɛnda le a kɛyaŋ. Te waŋnda chal pɛ o nɔɔ niŋ a yiyaŋ waa naa o kɔl, mɛɛ o kandɔŋndo pa nda kɛɛ loo o lediom ni.”​—Chiaŋ

MƐƐNDAŊ NUMPILA

Te sɛɛŋgiaŋndo del nya pɛ tɛɛŋ . . . .

• Baa a kial pa suei le wana nya cho o nɔɔ niŋndo?

• Baa ma yiyaŋ pa maa ndoo wa fisa mi waŋnuŋ a wana cheleŋ?

• Baa dimioo ŋ cho ni maa “I chii a num” ɔɔ “I cho lakɔ wana cheleŋ nuuviaa o che ya wana sɔvɛ wo”?

Nyunalaŋ ndaŋ opilɛ bɛɛ ŋ muli ni aa ei, mɛɛ teleŋndo cho hoo ni le ma tosa nyɛ, le loo o lediom o nɔ numndo niŋ.

SUUKAŊ A PƆNƆ NUM ƆƆ LAA NUM O NYUNALAŊ NDAŊ CHOO

• Baa loo o lediom o nɔ naa niŋ cho pa tolɔɔ toolo? Te lende i cho ni, le yɛɛ?

• Sɔɔŋ kuɛɛ naŋ nɔ yɛ miŋ tosa le loo o lediom o nɔ naa niŋ?

SƆƆŊ Ŋ NƆ MA WA TOSAA WOŊ

• Wa wana nya cho o nɔɔ niŋndo diomnda kaalaa laŋ poonyiallo teleŋndaŋ lapum

• Kɛsi fotuei wana nya cho o nɔɔ niŋndo o tibiiyo choo o fondaŋ num wallo

• Wa wana nya cho o nɔɔ niŋndo veeloo o foŋndo choo teleŋ o teleŋ nya ve naapilɛ le

SAWA MANDAA BAABUIYO: “Nyɛ Mɛlɛka mɔɔsa pɛ naapilɛ, wanachiee nɔ mbo piɔu ndu tɛɛŋ te.”​—Maatiu 19:​6.