YOVALIKWALI
1: Mugano
YISINKE AYI TANTA
Mugara nomukadi ava va litura mo unene mononkwara dawo kuditara asi elikwatakano lyokukarerera ntani kupopera nonkwara dawo. Nkenye mulikwali kukara nehuguvaro asi mukwawo nga fumadeka elikwatakano lyawo, nampili moyiruwo yomaudigu.
Valikwali vamwe kulisininika kutunga kumwe morwa makondjeso govantu novanekoro. Nampili ngoso, nonkwara edi va tatekera keharo nefumadeko yido nonkwara adi karerere.
MPANGO ZOMOBIBELI: “Yipo nye a sigire mugara nozina, makura ta likwatakana namukadendi, makura tava kara gumwe tupu.”—Genesis 2:24.
Micah kwa tanta asi: “Nsene wa litura mo unene mononkwara doge, ove kapi ngo fundauka-fundauka usimbu. Ove ngo genderera kugusira po ntani kuhundira egusiropo. Ngo tara maudigu asi yilimbikiso, nye kapisi gokutezesa po nonkwara.”
EYI YA KARERA NOMULYO
Apa ava ligwanekere nomaudigu, valikwali ava va dira kulitura mo unene mononkwara dawo, awo narunye kutanta asi: ‘Ose kapi twa lizasana’ ntani awo kupapara nokonda yipo va lizumbe.
Jean kwa tanta asi: “Sinzi sovantu kuhwilira mononkwara negano eli asi nsene kapi ngayi ka genda po nawa ngava ka lizumba. Vantu ava ava hwilire mononkwara nomagazaro gangoso, mugano gwawo ngoso nare kuna kuzegeza kutundilira ketameko.”
EYI NO RUGANA
LIPURA ASI
Nsene kuna kulitangwisa . . .
Ove nkenye apa kulivera kweyi wa kwara muntu ogo ndi?
Ove kugazadara hena muntu gumwe gwapeke ndi?
Ove kuuyunga nonkango edi: “Tani ku zumbu” ndi “Tani zi ni ka papare ko ogu na ka vhura kuhafesa nge”?
Nsene elimbururo komapuro ogo asi yimo, ngesi yiso siruwo sokunkondopeka mugano gweni gomononkwara.
ZOGERA NOMULIKWALI GOGE
Kapi tuna kuvhura hena kusikisa mo mugano gwetu gononkwara ndi? Nsene yimo, morwasinke?
Yininke musinke natu rugana ngesi yipo tu nkondopeke mugano gwetu gomononkwara?
MAGANO
Tjangera mulikwali koge nonkango deharo nkenye apa
Mokukwaterera komugano goge gonononkwara tura efano lyomulikwali goge positafura sokoyirugana yoge
Nsene koyirugana ono kara ndi kwapeke, bela mulikwali goge nkenye siruwo
MPANGO ZOMOBIBELI: “Eyi ga gwanekedesa Karunga, muntu walye a yi gaununa.”—Mateusa 19:6.
