Tau bona hahine na e uramu edia headava lalonai bae noho namonamo, unu amo e hahedinaraiamu edia headava na mia hanaihanai ḡauna bona be gimaiamu. Tau eiava hahine ese be abia daemu adavana ese ia na basine rakataniamu, ena be nega dikadia bae vara.

Headava taudia haida be e gwaumu idia na e noho heboumu badina turadia o edia famili ese e doridiamu dainai. To, headava taudia bae noho namonamo badidia badadia bini, idia na e helalokau hehenimu bona e hemataurai hehenimu.

BAIBUL ENA SISIBA: “Tau ese danu adavana basine hadihoa.”​—1 Korinto 7:​11.

“Bema oi na o uramu emu headava lalonai ba noho namonamo, oi na basio badu haraḡamu. Oi ese adavamu ena dika na bo gwau tao haraḡamu bona bo sori haraḡamu. Hekwakwanai na bo hamaoromaoromu, a basio gwaumu hekwakwanai ihamaoromaorona totona ba divorce be namo, lasi.”​​—Micah.

Headava lalonai hekwakwanai e varamu negadiai, adavadia ida asie noho namonamomu taudia na kara haraḡa be gwaumu: ‘Basiama headava hari namo’ bona dala be tahumu headava bae hapararaia totona.

“Taunimanima momo e headavamu badina e laloamu hekwakwanai bae vara neganai bae divorce diba. Una divorce lalohadaina e abiamu taudia na e headava dinana amo vada se noho namonamomu.”​​—Jean.

SIBOMU BA HENANADAI:

Hepapahuahu o heai e varamu neganai . . .

• Oi be o lalohisihisimu badina ia o adavaia dainai, a?

• Oi be lalohadai kererena o abiamu, heḡereḡere o uramu tau ma ta (o hahine ma ta) ba adavaia be namo, a?

• Oi be ini o gwau tomamu, “Oi na ba rakatanimumu” eiava “Lau e lalogu badamu tauna ta (o hahine ta) baina tahua,” a?

Bema atai henanadaidia ginigunana o toiosi ai emu haere na ‘oibe,’ anina na harihari dala ba tahu adavamu ida ba noho namonamo totona.

ADAVAMU IDA BA HEREVALAI ḠAUDIA

• Eda headava lalonai be asita noho namonamomu, a? Bema lasi, dahaka dainai?

• Harihari dahaka baita karaia diba baita noho namonamo totona?

HEDURU HEREVADIA

• Nega ta ta ai, adavamu ena lalokau revarevana ta ba torea

• Moni ḡaukara gabunai, emu teibolo latanai adavamu laulauna bavatoa, unu amo bo hahedinaraia oi adavamu ida na o noho namonamomu

• Herevana oi na ḡaukara gabunai o edeseniai, to dina ta ta ai, adavamu ba rini henia be namo

BAIBUL ENA SISIBA: “Dirava ese vada e hahekapudia taudia na taunimanima ese basie hapararadia.”​—Mataio 19:6.