ÑA̱ KIVI CHINDEÉTÁʼAN XÍʼIN NA̱ XA̱A̱ TI̱NDAʼA̱
1. Kundi̱ʼi̱-inindó xa̱ʼa̱ na̱ ti̱ndaʼa̱ xíʼinndó
¿NDÁAÑA KÚNI̱ KACHI ÑA̱YÓʼO?
Na̱ xa̱a̱ ti̱ndaʼa̱ na̱ ndixa ndíʼi̱-ini xa̱ʼa̱ táʼan, viíní kítáʼanna ta kúni̱na koona xíʼin táʼanna ndiʼi tiempo, ta ña̱yóʼo chíndeétáʼan xíʼinna ña̱ kǒo sandákootáʼanna ni nda̱a̱ ndáaka ña̱ ná ndoʼona.
Sava na̱ xa̱a̱ ti̱ndaʼa̱ íyokana xíʼin táʼanna xa̱ʼa̱ ña̱ íxandúxa na̱ veʼena á migona xíʼinna. Soo ña̱ ndáyáʼviníka kúú ña̱ ná koona xíʼin táʼanna xa̱ʼa̱ ña̱ kúʼvi̱-inina xínitáʼanna ta ixato̱ʼó táʼanna.
TEXTO ÑA̱ VA̱XI NU̱Ú BIBLIA: “Ta ta̱ íyo ñá síʼi va̱ása xíniñúʼu sandákoora ñá síʼira” (1 Corintios 7:11).
“Tá ndixa ndíʼi̱-iniyó xa̱ʼa̱ na̱ ti̱ndaʼa̱ xíʼinyó va̱ása sa̱a̱ kamayó xíʼinna. Ta saátu kǒo ixayo̱ʼvi̱ña xíʼinyó ña̱ koo káʼnu-iniyó xa̱ʼa̱na ta saátu ña̱ ndukúyó ña̱ káʼnu-ini nu̱úna, ta tu̱ndóʼo ña̱ yáʼayó nu̱ú ná va̱ása taxiyó ndataʼvíña miíyó” (ta̱ Micah).
¿NDA̱CHUN NDÁYÁʼVINÍ ÑA̱YÓʼO?
Tá na̱ ti̱ndaʼa̱ va̱ása ndíʼi̱-inina xa̱ʼa̱ táʼanna, tá ná ya̱ʼana nu̱ú tu̱ndóʼo kivi ndakanixi̱nína ña̱ va̱ása níxiniñúʼu tindaʼa̱na xíʼin táʼanna ta ndukúna ki̱ʼva ña̱ sandákootáʼanna.
“Ku̱a̱ʼání na̱ yiví tá xa̱a̱ tíndaʼa̱na ndákanixi̱nína ña̱ kivi sandákootáʼanna, tá xa̱a̱ ti̱ndaʼún ta ndákanixi̱níún ña̱ sandákoún na̱ ti̱ndaʼa̱ xíʼún, náʼa̱ña ña̱ va̱ása ndixa níxindi̱ʼi̱-iniún xa̱ʼa̱na” (ta̱ Jean).
¿NDÁAÑA KIVI KEʼÚN?
NDAKANIXI̱NÍ XA̱ʼA̱ ÑA̱YÓʼO
¿Ndáaña kéʼún tá náún xíʼin na̱ ti̱ndaʼa̱ xíʼún?
¿Á ndíkó-iniún xa̱ʼa̱ ña̱ ti̱ndaʼún?
¿Á ndákanixi̱níún ña̱ viíka koún xíʼin inka na̱ yiví?
¿Á káʼún “sandákoi̱ yóʼó” á “ndukúi̱ inka na̱ ndixa ndíʼi̱-ini xa̱ʼíi̱”?
Tá nda̱kuiún iin á ku̱a̱ʼáka pregunta yóʼo, náʼa̱ña ña̱ xíniñúʼu chika̱a̱kaún ndee̱ ña̱ kundi̱ʼi̱-iniún xa̱ʼa̱ na̱ ti̱ndaʼa̱ xíʼún.
NATÚʼUN TÁʼANNDÓ XA̱ʼA̱ ÑA̱YÓʼO
¿Á ki̱xáʼayó náʼa̱yó ña̱ va̱ása ndíʼi̱ka-iniyó xa̱ʼa̱ táʼanyó? Tá saá íyoña, ¿nda̱chun?
¿Ndáaña kivi keʼéyó ña̱ va̱ʼa ndasandakúkayó ña̱ kítáʼanyó xíʼin táʼanyó?
ÑA̱ KIVI KEʼÚN
Sava yichi̱ kivi kaʼyíún carta taxiún ndaʼa̱ na̱ ti̱ndaʼa̱ xíʼún ña̱ va̱ʼa na̱ʼún ña̱ ndixa kúʼvi̱-iniún xíniúnna.
Kuumií na̱ʼná na̱ ti̱ndaʼa̱ xíʼún nu̱ú káchíñún.
Ka̱ʼa̱n xíʼin na̱ ti̱ndaʼa̱ xíʼún, xíʼin teléfono ndiʼi ki̱vi̱ tá káchíñún á tá ku̱a̱ʼún inka lugar.
TEXTO ÑA̱ VA̱XI NU̱Ú BIBLIA: “Xa̱ʼa̱ ña̱yóʼo na̱ sa̱kítáʼan Ndióxi̱ ná kǒo taʼví inka na̱ yivína” (Mateo 19:6).
