Mulopwana ni muthiyana yaawo apanke nlakano, anoona othela waya okhala wa elukuluku yoothene, nave nlakano nlo ninnaweeriha okhala oolipiheya. Oopiili annaroromela wi mmoha ti mmoha onahaala okhapelela othela owo naamwi mu sookacamiha.

Atheli akina annakhinyereryeya okhala vamoha nthowa na amusi ni asinthamwene. Nto echu yaphaamaxa nri nlakano nenlo nnathipeleya mu osivela ni ncicimiho.

PIIPILIYA ONI: “Mulopwana ahimwalane ni mwariye.”—1 Korinto 7:11.

“Waakhanle wi moopaka nlakano hamunaphwanela waakuvelaka onyeenyeya. Munaphwanela waakuvela olevelela ni oveka nikhurumuwelo. Mooneke makacamiho anyu ntoko nikoco nri mumphironi ohiya ntoko mwaako ohoolo wanyu.”—Micah.

Vaavaa anakumanaaya ni namvutuka, atheli yaawo ahinacicimiha nlakano na othela annaakuvela wuupuwela eriki, ‘nikhami nahu hanniiwanana’ nave annaavya mikhalelo sa omwalana.

“Achu ancipale annathelana yuupuwelelaka omwalana muhoolo. Vaavaa ela eneereyaaya, nlakano naya ninnaceecheya ovinyerya omapacereryo.”—Jean.

MWIISAALIKHELE

Wakhumelela ohiiwanana . . . 

• Apwanne munnakhalano ekeerelani ya othelana ni muchu yoowo?

• Apwanne munnaanyiherya muri ni muchu mukina?

• Apwanne munnaloca masu ntoko “kinamoohiya” naari “kinaya omwaavya muchu onakipwacha”?

Waakhanle wi naakhulo nanyu ti nawi “aai”, ela elukuluku wi mulipihe nlakano nanyu.

MULOCE NI OOTHELANA ANYU

• Apwanne nlakano nahu nookukuceya? Waari hiiha, ntakhara heeni?

• Tiheeni nnaphwanelaahu weera wi nlipihe nlakano nahu?

MWEERERYE ELA

• Ikwaha ikina mmurepele oothelana anyu ekaarata ya osivela.

• Mooniherye nlakano nanyu moorweela wa okuha iruku sa oothelana anyu va wooneyavo omutekoni wanyu.

• Mmwiichane oothelana anyu mu telefone muri omuteko naari nipuro nikina.

PIIPILIYA ONI: “Yeyo Muluku ophitànnyeiye, mutxhu ahimwalanye.”—Mateu 19:6.