Ba wamaigi foʼomo ira matua ba foʼomo ira alawe si no fawuʼu li, fangowalura andrö hulö böbö saro si tebai aetu. Daʼa zameʼe khöra faʼahono dödö. Faduhu dödöra khö nawöra wa tola aro wongambatöra hewaʼae na alua gabula dödö.

So zongambatö si lö omasi fabali ha enaʼö böi afatö dödö nösi nomora hegöi ira awöra. Hizaʼi, abölö sökhi na fao manö ira börö me laʼomasiʼö ba lafosumange nawöra.

NIWAʼÖ ZURA NIʼAMONIʼÖ: ’Foʼomo ira matua, böi yamuröi ndra alawenia.’—1 Korindro 7:11.

”Na no fawuʼu li ita, lö alio-lio abao dödöda, alio wangefaʼö sala ba taʼandrö waʼebolo dödö. Na alua gabula dödö, ba wamaigida daʼö ha taha-taha tenga si tebai muʼasiwai irege alua wabalisa moloʼö huku.”—Micah.

Ba ginötö alua gabula dödö, foʼomo ira matua ba ira alawe si no mangolifugö buʼusa lira, te lamane, ’Lö khöma saʼae fahasara dödö’. Aefa daʼö, laʼalui lala ba wangetuʼö fongambatöra.

”Me mangowalu zi samösa niha, lawaʼö tödöra wa tola fabali ira moloʼö huku na lö lasöndra waʼohahau dödö ba wangowalura. Daʼö dandra wa iʼotarai wamobörö lö saro ba dödöra mbuʼusa li me mangowalu ira.”—Jean.

ANGERAGÖ ATÖ

Ba ginötö alua gabula dödö . . .

• Hadia so khöu waniasa me no mangowaluʼö khö ngambatöu?

• Hadia so ba dödöu ndra matua mazui ira alawe tanö böʼö?

• Hadia no irai öwaʼö zimane daʼa ”Ulau manö mofanö” mazui ”Uʼalui manö niha böʼö si tola mamosumange yaʼo”?

Na öbeʼe wanema li yaʼia ba zi sambua fanofu mazui töra, daʼa ginötönia ba wangaʼaroʼö ba dödöu hadia zi no öfabuʼu.

FATUNÖISI KHÖ NGAMBATÖU

• Hadia lö saʼae aro mbuʼusa li ba wongambatöda? Na löʼö, hadia mbörö?

• Hadia nifaluada enaʼö aro mbuʼusa lida?

TIPS

• Sura ngawua wehede sangoromaʼö wa öʼomasiʼö ngambatöu

• Foromaʼö wa öʼameʼegö tödö mbuʼusa limö yaʼia na öbeʼe koda ngambatöu ba dete meza wohalöwöu

• Aseseʼö telefo ngambatöu ba ginötö so ndraʼugö ba naha wohalöwömö mazui na so ndraʼugö ba nahia saröu

NIWAʼÖ ZURA NIʼAMONIʼÖ: ”Hadia niʼosambuaʼö Lowalangi tebai ifabali niha.”—Mataiʼo 19:6.