VOKUELINEPA
1: Wahasoke Okuyekapo Mukwenyi
OTYO OTYITYI?
Vokuelinepa tyina velihole umwe unene, vakala nawa mokonda vetyii okuti vena okukala kumwe apeho. Aveho vevali vena onthumbi yokuti ovipuka nga vilema-lema umwe, mukuavo kamemuyeke-po.
Vamwe vokuelinepa, tyokulihenga vetyisoka umwe, mahi vatila vala owoma etyi ombunga yavo nomapanga avo mavapopi. Mahi onthwe tyina tuhole umwe unene mukuetu tuelinepa nae, tulikuatehila tulinge etyi tuemupopilile okuti matukala kumwe apeho. Tulinga ngotyo mokonda tumuhole, tuna onthilo nae.
ONONDUNGE MBO MBIMBILIYA: “Omulume ahayeke-po omukai wae.” — 1 Ova Kolindu 7:11.
“Omunthu tyina momutima wae etyii umwe okuti mavakala kumwe apeho, wati umwe oe wiita liwa otyiponyo tyina amapengesa, oe upolela-po liwa mukuavo. Tyina muna ovitateka meumbo, kamusoko okulihenga, mututumba umwe muvimane-ko.” — Micah
OITYI OTYIPUKA OTYO TYESUKISILA?
Ava vokuti pamwe momutima vasoka okulihenga, oo hamwe vasoka okuyekapo mukuavo, tyina vakala novitateka meumbo vati: ‘Onthwe muene katuelitokalele-ale, ñgeno ankho katulinepe-ale.’ Ovanthu ngo ovo pokulihenga kavasetepo-ale.
“Vamwe vanyingila-le motyinepo nolusoko lwokuti ine kavelivilile, mavelihenge. Omunthu tyina asoka ngotyo, otyinepo tyavo tyihimbika-le omapita.” — Jean.
OITYI UPONDOLA OKULINGA?
LITALA NAWA OVE MUENE
Tyina meumbo muelinumanena . . .
-
Okuti ulivela etyi muelinepa na mukwenyi muna-e meumbo?
-
Okuti usoka komunthu omukuavo ñgeno ankho muelinepele nae?
-
Okuti upopia ovipuka vimwe ngevi: “Meumbo muno mandyitundu-mo andyovola omunthu omukuavo tulivila nae”?
Ine povipuka ovio una tyimwe uhole okulinga, opo naina una okulikuatehila uhumbe vali mukwenyi opo tyokumuyekapo wehetyisoke vali.
TOMPHOLEI OMAPULO AA NA MUKWENYI
-
Okuti po tete etyi tuelinepa tyokulihenga katutyisoko-ale, mahi pahe ngoti pamwe tyihanda okuya momutwe? Ine pamwe tutyisoka, omokonda yatyi?
-
Oityi atuho vevali tupondola okulinga tuehetyisoke vali?
LINGEI NGETYI
-
Pamwe honekela mukwenyi oundaka umwe ukahi nawa
-
Apa uundapa, paka-po ofoto ya mukwenyi opo ovanthu aveho vetyimone okuti umuhole
-
Tyina hamwe muelikalela katutu kokule, mulikalela mutomphole-po kapii
ONONDUNGE MBO MBIMBILIYA: “Etyi Huku awaneka kumwe omunthu ehetyiyapule.” — Mateusi 19:6.
