ZIGWASYA BAKWETENE
1: Kulipeda
CHAMBAANZI?
Baalumi abakayintu balipedelede mulukwatano balizi kuti tabeelede kulekana pe alubo balimvwa kabakwabilidwe. Boonse basyoma kuti tabakalekani pe nikuba kuti baswaana buyumu-yumu mulukwatano.
Bamwi bantu mulukwatano basala kutalekana nkaambo bayoowa kuti beenzinyina naakuti bamumpuli balababona kuti tabali kabotu. Pesi chiyandikana mulukwatano nkuti boonse bakkale kabalipedelede, kabayandana akulemekana.
NZILYAAMBA BBAYIBBELE: “Mwaalumi teelede kuleka mukaakwe.”—1 BaKorinto 7:11.
“Kuti kulipedelede mulukwatano, tukoofwambaana kunyema. Unoofwambaana kulekelela akufwambaana kukumbila lulekelelo. Tukooyeeya kuti buyumu-yumu mbumuswaana butondeezya kuti mweelede kulekana.”—Micah.
NKAMBOONZI NIKUYANDIKANA?
Bakwetene batalipedelede nibaswaana buyumu-yumu, balakonzya kuyeeya kuti, ‘Teengundakasalilidwe pe’ mpawo ngabayeeya kulekana.
“Bantu biingi ngabakwatana kabayeeya kuti balakonzya kulekana kuti kabatachibotelwi mulukwatano. Kuti bantu bakwatana kabayeeya kuti bayoolekana, chaamba kuti teebakalipedelede pe nibakakwatana.”—Jean.
NZUKONZYA KUCHITA
LILANGE-LANGE
Kuti kwaba kutamvwanana . . .
-
Ulalisola na kuti nkamboonzi nwaakakwatana amuntu ooyo?
-
Uyeeya kuti kaansinga uli awumwi muntu na?
-
Ngawaamba kuti “Nsichikuyandi” na naakuti “Ndizoomujana uundimvwisisisya”?
Kuti nsandulo yako kayili iiyi kumibuzyo eeyi, weelede kubeleka changuzu kuti ulipede mulukwatano lwanu.
WAMBUUZYANIA MIBUZYO IITOBELA ANGUKWETENAAWE
-
Tuchilipedelede na mbuuli mbutwakali kuchita chiindi? Kuti kakutali oobo, nkamboonzi?
-
Tweelede kuchitaanzi kuti tulipede mulukwatano lwesu?
ZIKONZYA KUMUGWASYA
-
Chiindi achiindi, lembela ngukwetenaawe kagwalo kali amajwi aaluyando
-
Tondeezya kuti ulilipedelede kwiinda mukubikka zifanikisyo zyamuntu ngukwetenaawe atebbulu kumulimu naakuti nkubelekela
-
Wambuuzyania angukwetenaawe nuli kumulimu naakuti nimutali aamwi
NZILYAAMBA BBAYIBBELE: “Abo mbaakakakatizya Leza muntu atabapambukanyi.”—Matayo 19:6.