Anarume ne anakadzi akadzipira anoona mucato wawo hinga mubatanidzwa we upenyu wese uye izvi zvinoita kuti asagare ne cekuthyira. Umwe na umwe wawo, unoziya kuti aazorambwi kunyazi kana akasongana ne matambudziko mu mucato wawo.

Amweni ari kurumbwa ari ese ngekuti hama ne shamwari ndidzo dzinoti asarambane. Asi kudzipira kunodikana kubva pakuti munodanana uye munoreremedzana.

ZVINOBHUYA BHAIBHERI: “Mwanarume aadikani kusiya mukadzi wake.”—1 Akorinti 7:11.

“Kana makadzipira kune umweni wenyu, munokasika kumurekerera kana akamushaishira uye kana mamushaishira munokasika kukumbira rurekerero. Amuzorangariri zvekurambana kana mukasongana ne matambudziko.”—Micah.

Kana mwamuna ne mukadzi asikazi kudzipira akasongana ne matambudziko, anosonyanya kurangarira kuti, ‘Wainga asiripi wangu’ uye anopsvaka mazano e kuti aramabane.

“Akawanda anopinda mu mucato akaronga kuti kana zvikatama kuhamba zvakanaka anorambana. Kana anhu akapinda mu mucato ano murangariro wekuzoramabana, zvinonga zvecipangidza kuti kubvira pakutanga anonga asikazi kudzipira ku umweni wawo.”—Jean.

DZIONGOROREI

Pamunonga mecinetsana . . .

• Munosombotsumba here kuti kudai tisikazi kuwakana?

• Muno munhu umweni wamunorangarira kuti kudai naainga ari iyena wamakawakana naye here?

• Munosomboreketa here kuti: “Ndaa kwenda” kana kuti “Zviri nani ndipsvake umweni unondida”?

Kana paripo pamadaira kuti honde, ino ndiyo nguwa yekumbambisa nyumba yenyu.

CEDZAI NE MUDONI WENYU

• Mucato wenyu ucakabamba here? Kana usikazi, cinyi ciri kuitisa kudaro?

• Zvinyi zvatingaita kuti titunhudzire kubambisa nyumba yedu?

MAZANO

• Potai mecitarira umweni wenyu masoko e rudo

• Pangidzai kuti munoda mudoni wenyu nge kukanda foto yake pa meza ye kubasa

• Kweerai bote umweni wenyu kana kumutumira mesaji mazuwa ese pamunonga muri ku basa kana musiripopi

ZVINOBHUYA BHAIBHERI: “Ngapasaoneke munhu unoparadzanisa zvasungwa pamwepo pa djoki na Mwari.”—Mateu 19:6.