Nico giku dhaku ma gibetimo lembe karacelo i gamiri migi, gitie calu ve jaring avio man jakony pare, ma gibelubo lembe ma rom pi niringo kud avione. Bende, kinde ma peko uwok, ng’atuman m’ugamere paru nia, “wa” kakare niparu nia, “an.”

CIK MIR UKUNGU MI BIBLIA: “Dong’ gitie gin ario kendo ngo, ento kum acel.”​—Matayo 19:6.

“Gamiri utie ngo nitimo lembe kendjo. Ento nico giku dhaku gicikiri nitimo lembe karacelo kara giketh ewoth ma ber.”​—Christopher.

Kinde ma ka peko uwok, nico giku dhanu ma gitimo ngo lembe karacelo gicaku nineno nia kosa utie pa ng’a, kakare nisayu yore mi daru pekone adara. Eno ketho lembe ma kabang’e mbe de doko ni thwon lembe.

“Nitimo karacelo utie ve yath ma ketho gamiri bedo ma ber. Ka nwang’u waku won ot para wabed watimo ngo lembe karcelo, nwang’u wacibedo ve jumoko ma gibekwo i ot ma rom ento ungo calu ju m’ugamiri; niwacu dhanu ario ma gibekwo karacelo ento kan edoko mi maku yub moko ma pire tek ng’atuman neno i wang’e.”​—Alexandra.

KE PENJIRI KUMAE

• Nyo abed aneno nia sente m’anwang’u “zoo utie para”?

• Kara anamb cuu mandha, nyo abed amito kwa abed kaka ma jadhoga mi gamiri umbe i iye?

• Nyo abed awinjara ngo ku wedi pa jadhoga mi gamiri, ma en ke ebewinjere ma ber kugi?

WUWECI WUKU JADHOGI MI GAMIRI

• Lembe ma kani ma wabed watimo ma ber karacelo i gamiri mwa?

• Lembene ma kani ma wacopo yiko?

• Yub ma kani m’ukwayu wamaki pi niyiko ayi mwa mi timo lembe karacelo?

JUK MA TUNG’ TUNG’

• Kepar nia jubetuko kwaya moko mi mupira man wuku jadhogi mi gamiri wun’i thenge ma tung’ tung’. Dong’ iromo timo ang’o kara idok i thenge ma jadhogi mi gamiri n’i iye kara wun ario zoo wubed i thenge ma rom?

• Kakare niparu nia, ‘acopo loyo nenedi?’ Ukwayu ipar nia, ‘wacopo loyo nenedi?’

“Wek nibeparu nia ng’a m’utie ku kosa, man ng’a m’umbe ku kosa. Lembe maeno pire tie tek ungo pi nibedo ku kwiyocwiny man i acel i gamiri peri.”​—Ethan.

CIK MIR UKUNGU MI BIBLIA: “Kud wuyeny bero mwu kende, ento wuyeny bero mi jumange bende.”​—Jufilipi 2:3, 4.