FURUƝƆGƆNMAW
3: A’ ye ɲɔgɔn bonya
O KƆRƆ YE MUN YE?
Furuɲɔgɔnma minnu bɛ ɲɔgɔn bonya, olu bɛ u janto ɲɔgɔn na hali ni bɛnbaliyaw wulila u ni ɲɔgɔn cɛ. “Hali ni u ka ko yecogow tɛ kɛ kelen ye tuma dɔw la, u si tɛ u poron u hakilina kan,” gafe dɔ y’o fɔ min tɔgɔ ye ko Ten Lessons to Transform Your Marriage. “Nka u bɛ to ka kuma ɲɔgɔn fɛ u ka bɛnbaliyaw ko la. U bɛ ɲɔgɔn hakilinaw lamɛn ni bonya ye walasa ka u ka bɛnbaliyaw ɲɛnabɔ cogo la min bɛ bɛn u fila bɛɛ ma.”
BIBULU SARIYAKOLO: “Kanuya . . . t’a yɛrɛ nafa ɲini.”—1 Kɔrɛntekaw 13:4, 5.
“Ka n’muso bonya o kɔrɔ ye k’a jira a la ko nafa b’a la n’ɲɛkɔrɔ. Ne t’a fɛ ka ko fosi kɛ min bɛ a tɔɔrɔ walima min bɛ se ka an ka furu tiɲɛ.”—Micah.
MUN NA O NAFA KA BON?
Furuɲɔgɔnma minnu tɛ ɲɔgɔn bonya, olu bɛ se ka laban ka kɔrɔfɔli kumaw, mafiɲɛyali kumaw walima kuma juguw yɛrɛ fɔ ɲɔgɔn ma—ɲininikɛlaw y’a jira ko o ye kow ye minnu laban bɛna ni furusa ye.
“Kuma juguw walima ɲagarilabɔ kuma minnu bɛ digi mɔgɔ la, olu b’a to ne muso ka tigɛ a yɛrɛ la, u b’a to a ka dannaya bɛ tiɲɛ ka ɲɛsin ne ma ani ka an ka furu tiɲɛ fana.”—Brian.
I BƐ SE KA MIN KƐ
I YƐRƐ SƐGƐSƐGƐ
I bɛ kuma minnu fɔ ani i bɛ ko minnu kɛ ka ɲɛsin i furuɲɔgɔn ma, olu jateminɛ dɔgɔkun kelen kɔnɔ. O kɔ i yɛrɛ ɲininka:
‘Ne ye n’furuɲɔgɔn kɔrɔfɔ siɲɛ joli, ani ne y’a tanu siɲɛ joli?’
‘Cogoya kɛrɛnkɛrɛnnen jumɛn na, ne ye bonya jira n’furuɲɔgɔn na?’
KUMA NI I FURUƝƆGƆN YE
Wale ni kuma sugu jumɛnw de bɛna aw fila bɛɛ dɛmɛ k’a ye ko aw bɛ ɲɔgɔn bonya?
Wale ni kuma sugu jumɛnw de b’a jira ko aw tɛ ɲɔgɔn bonya?
LAADILIKANW
Fɛn saba sɛbɛn i b’a fɛ i furuɲɔgɔn ka min kɛ walasa ka bonya jira i la. I furuɲɔgɔn ɲininka ni a fana bɛ se ka o ɲɔgɔn kelen kɛ. A’ ye minnu sɛbɛn, a’ ye o di ɲɔgɔn ma ani ka cɛsiriw kɛ walasa ka o fɛn sɛbɛnnenw waleya ka ɲɛsin ɲɔgɔn ma.
I furuɲɔgɔn jogo minnu ka di i ye olu bɛɛ sɛbɛn. A fɔ a ye ko o jogo ninnu ka di i ye kosɛbɛ.
“Ka n’cɛ bonya, o kɔrɔ ye ko ne bɛ to k’a jira a la ko a nafa ka bon ne ɲɛkɔrɔ ani ko ne b’a fɛ a ka nisɔndiya. Bonya kɔrɔ tɛ ko i ka kan ka kobaw kɛ tuma bɛɛ, nka tuma dɔw la, n’i ye ko fitiniw caman kɛ ka tugu ɲɔgɔn na, olu bɛ se k’a jira ko i bɛ i furuɲɔgɔn bonya tiɲɛ yɛrɛ la.”—Megan.
Sani i ka fɔ ko e fɛ i b’i furuɲɔgɔn bonya, a ɲini ka a dɔn n’a y’a sɔrɔ i furuɲɔgɔn b’a miiri ko i bɛ a bonya tiɲɛ yɛrɛ la, i furuɲɔgɔn bɛ min miiri o de nafa ka bon.
BIBULU SARIYAKOLO: “O de y’a to aw ka hinɛ ni ɲumaya ni yɛrɛmajiginlenya ni sabali ani muɲuli don aw la.”—Kolosekaw 3:12.
