Juwa jidapanʉrata yiya wawiabʉta ũdubipanʉbʉrʉ yiya wãrĩnu krĩchabʉta ũdubidayi bedʼea abarika ze ẽ mina. Libro kartaba Diez claves para transformar tu matrimonio jarabʉ: «Naʉ̃ra juwa jidapanʉraba jarada ẽ ãya jarabʉrʉtrʉ iyita. Awuarabʉrʉ ãyi bedʼea zroma ʉ̃rʉ bedʼeabʉ. Mawũã ãyita bedʼea awuarabʉbʉrʉ bedʼeapanʉ bedʼea abarika zebita».

DAIZEZE BEDʼEABA JARABɄTA: «Kãgara» «iyitrʉ jʉ̃zaba krĩcha ẽ» (1 Corintios 13:​4, 5).

«Mʉ̃itara, mʉ̃ kimata wawia ũdubibʉ baera mʉ̃ara bia akʉbʉ iyira akʉza oẽ mʉ̃a iyi sopʉabibʉta mawũã dai juwa jidapanʉ ãrĩ ẽ baita» (Micah).

Juwa jidapanʉrata yiya wawiata ũdubida ẽ bʉrʉ ãyi bedʼeabʉrʉdera i kayirua bedʼeaseapanʉ mawũã sopʉa oseabʉ. Ẽbẽrarã buru biaraba jarapanʉ, ẽbẽrarã juwa jidapanʉrata maʉ̃ta obʉbʉrʉ ãyira ewari berabari wãne yi idubʉseapanʉ

«Yi kimata i kayirua jarabʉbʉrʉ mawũã ẽ bʉrʉ iya aña obʉ kʼarea ipidabʉbʉrʉ, maʉ̃ bedʼeaba krĩchabiseabʉ iyikʉza zeri ẽãta akʉza maʉ̃ba bʉde ĩjã ẽ bayi» (Brian).

KRĨCHARA

Krĩchara bʉ kimaʉ̃me sãwũã bedʼeabasita naʉ̃ semana berabariside, maʉ̃ tẽã maʉ̃ widita panʉra:

• ¿Bʉara kʼãrẽaba i kayirua jarasi bʉ kimara akʉza kʼãrẽaba ibia jarabʉ iyi ʉ̃rʉ?

• ¿Sãwũãbʉde wawiabʉta ũdubisi?

YIYA BEDʼEAIDUA

• ¿Kʼãrẽ bedʼeaba ũdubiseabʉ dayi wawiapanʉta?

• ¿Kʼãrẽ bedʼeaba ũdubiseabʉ dayirã wawiada ẽãta?

ŨRÃGʼA

• Ãyi aba abakaʉba bʉibara ãyi kimaba kʼãrẽne wawiabʉta ũdubimarẽãbʉta. Maʉ̃are maʉ̃ bʉdata mayirai yiya diaidua akʉza zarea oidua maraba omarẽã kãgabʉta.

• Bʉra kʼãrẽta kãgabʉta bʉ kima ʉ̃rʉ akʉza maʉ̃ tẽã jarada kʼãrẽaba kãgabʉta.

«Mʉ̃itara mʉ̃a obʉdeba wawiata ũdubibʉ mʉ̃ kimara akʉza kãgabʉ iyita sobia bamarẽã. Nekʼãrẽ mejãcha oẽ baibara wãrĩnu wawiabʉ ũdubita awuarabʉrʉ nekʼãrẽ wikaʉba ũdubiseabʉ wãrĩnu wawiarãra» (Megan).

Dayi kimabʉrʉ iyikʉza krĩchaibara iyitrʉ wãrĩnu wawiapanʉta.

DAIZEZE BEDʼEABA JARABɄTA: «Kãgaba wua jʉ̃ra, ẽbẽra biabara, ʉ̃tabʉta krĩcharãra, urumʉ̃rʉãbara akʉza jʉ̃ãbara» (Colosenses 3:12).