ỌSI OKHUO BI ỌDỌ
3: Ekpẹn
EBI A RE ỌLE TA
Okhuo bi ọdọ ne mun ẹkpẹn nin egbe wo ji ẹmhọn ọzeva ele da rẹtẹ ele aharẹmiẹn ghe ele van. Ebe natiọle Ten Lessons to Transform Your Marriage da yọle ghe ẹmhọn ha zegbere, okhuo la ọdọ nọn mun ekpẹn nin ọzeva ọle ida yọle “gbegbegbe, ọsẹmhẹn ha sẹ.” Ele veva ki ko ha zilo nyan ọne ẹmhọn, yẹ ha ka egbe ehọ beji ele ha da sabọ re ọne ẹmhọn khian nọnsẹn.
ADIA NỌN RIBHI BAIBO: “Ahoẹmhọn-egbe . . . iguanọ ọsi egbe ọle.”—1 Corinthians 13:4, 5.
“Mẹn ha mun ekpẹn nin okhuo mẹn, mẹn ki ha rẹman ọlẹn ghe ẹmhọn ọlẹn ti mẹn bhọ. Mẹn ida lu emhin soso nọn ha si ikuan-egbe ji ọle la riia ibọdọ bi ireokhuo nọnsẹmhan an.”—Micah.
EBEZẸLE NỌN DA KHẸKE
Ahamiẹn okhuo bi ọdọ imun ekpẹn nin egbe, ele sabọ ha re unun riia egbe a, zẹ ọkhọbhunun nin egbe, la re egbe zọojiẹ. Ene guanọ otọ ẹmhọn fẹghe dọ kere ghe okhuo bi ọdọ ne re inian ne egbe talọ, ele kẹ sọebea.
“Uwẹ ha re unun ha gbe okhuo ẹ, la re ọle ha zọojiẹ, ọle ki ha ghe egbe ọle bii ọria nọn bha sẹ emhin soso. Sẹyẹ, ọle iyẹ da gbaẹkẹ uwẹ. Uwẹ ki yẹ riia ikolu nin uwẹ bi okhuo ẹ ko mhọnlẹn an.”—Brian
EBI UWẸ HA SABỌ LU
FẸ EGBE Ẹ GHE
Rẹ na bhi uzana ọkpa, gbẹlokotọ bhi emhin nin uwẹ lu bi ọta nin uwẹ ta, uwẹ ha nọọn egbe uwe:
-
‘Eka igba mẹn ne okhuo mẹn la ọdọ mẹn gui ranmhude emhin nin ọle bha lu nọnsẹn? Eka igba mẹn taman ọlẹn ghe ọle lu nọnsẹn?’
-
‘Emhin nela imẹn lu nin mẹn rẹ rẹman ghe mẹn mun ekpẹn nin okhuo mẹn la ọdọ mẹn’?
DEBA OKHUO Ẹ LA ỌDỌ Ẹ ZILO NYAN ENE INỌNTA NAN
-
Be imhan ha rẹ ha talọ yẹ la lu emhin yẹ nọn ha rẹman ghe mhan mun ekpẹn nin egbe?
-
Be imhan ha rẹ ha talọ yẹ la lu emhin yẹ nọn ha rẹman ghe mhan imun ekpẹn nin egbe?
EMHIN NE HA RẸKPA UWẸ
-
Gbẹn uwedẹ ea ọbhi otọ nin uwẹ guanọ nin okhuo ẹ rẹ ha mun ekpẹn nin uwẹ. Yẹ taman okhuo ẹ nin ọle gbẹn uwedẹ ea nin ọle guanọ nin uwẹ rẹ ha mun ekpẹn nanlẹn. Dọnmhegbe nin uwẹ rẹ ha mun ekpẹn nin okhuo ẹ la ọdọ uwẹ bhi ene uwedẹ ea nin ọle gbẹn re nin uwẹ.
-
Gbẹn emhin ne yẹẹ uwẹ bhi egbe okhuo ẹ la ọdọ ẹ. Uwẹ ha taman ọlẹn ghe ene emhin nan wo manman ti uwẹ bhọ.
“Emhin nin mẹn lu mẹn rẹ rẹman ọdọ mẹn ghe ọle ghan bhi ẹlo nọnsẹmhẹn, ghe mẹn yẹ guanọ nin ọle ha ghọnghọn. Ọ iyi ukpẹdẹ nin mẹn ha lu okpemhin, mẹn ha rẹman ghe mẹn mun ekpẹn nanlẹn. Ikuẹkuẹ emhin nin mẹn lu nanlẹn dẹ sabọ rẹman ghe mẹn gene mun ekpẹn nanlẹn.”—Megan
Bhi ọkike ọle, ọ iyi uwẹ ha re unun uwẹ tale si uwẹ mun ekpẹn nin okhuo uwẹ la ọdọ uwe. Okhuo ẹ la ọdọ e ha tare si uwẹ gene mun ekpẹn nanlẹn.
ADIA NỌN RIBHI BAIBO: “Bha re ẹkẹ-ẹjẹjẹ ọsi itohan hin egbe bha, ifuẹke, idegbere, ẹkẹ ọmẹnhiẹn, bi iziẹngbe.”—Colossians 3:12.
