KWONDŨ WA ALA MATWAANĨTE
3: Ndaĩa
ŨU NĨ KWASYA ATA?
Ethĩwa ala matwaanĩte nĩmanenganĩte ndaĩa, makethĩawa mendanĩte o na ethĩwa ve maũndũ matekwĩtĩkĩlana. Ĩvuku Ten Lessons to Transform Your Marriage yaĩtye, “Ala matwaanĩte na manenganae ndaĩa mayĩtĩkĩlaa kũemanwa mese kũvika vandũ wĩthĩe mayamba kũkwatĩanĩa. Vandũ va ũu, nĩmaneeneaa mathĩna ala maumĩla. Kĩla ũmwe nĩwĩthukĩĩasya woni wa ũla ũngĩ nesa, na maimantha ũndũ matonya kũkwatĩanĩa.”
MWOLOOTO WĨ MBIVILIANĨ: “Wendo . . . ndũmanthaa kwĩyĩuna.”—1 Akolintho 13:4, 5.
“Kũnenga kĩveti kyakwa ndaĩa kwonanasya kana nĩnĩkyonaa kĩ kya vata, na ndyenda kwĩka ũndũ o na ũmwe ũtonya kũkĩũmĩsya kana ũtonya kwananga mũtwaano witũ.”—Micah.
NĨKĨ NĨ ŨNDŨ WA VATA?
Ala matwaanĩte meethĩwa matanenganĩte ndaĩa, ũkeethĩaa yĩla meũneena kĩla ũmwe eĩka kumany’a ũla ũngĩ, meneenany’a na kĩvũthya, kana kũtetany’a. Asomi maĩtye kana asu nĩ maũndũ monanasya o tene kana mũtwaano ũsu nũtonya kwĩsa kũthela.
“Kũneena na kĩveti kyaku na kĩvũthya, kana kũkĩvũĩa ngũĩ nthũku no kũtume kĩyĩmena, kĩkaeka kũkũĩkĩĩa, na mũtwaano wenyu ũyanangĩka.”—Brian.
ŨNDŨ ŨTONYA KWĨKA
ĨYĨOSYE
Sũanĩa ũneeni waku na ũikunĩkĩla meko maku vandũ va kyumwa kĩmwe. Ĩtina wa ũu, ĩkũlye atĩĩ:
-
‘Nĩ mavinda meana ata nĩnaumanisye kĩveti kyakwa, na nĩ mavinda meana ata nĩnakĩkathie?’
-
‘Nĩ maũndũnĩ meva nĩnoonanisye nĩnĩnengete ndaĩa ũla ndwaanĩte nake?’
NEENEA MAKŨLYO AA WĨ NA ŨLA ŨTWAANĨTE NAKE
-
Nĩ meko ta meva, na ndeto ta syĩva itonya kũtuma kĩla ũmwe wenyu ew’a anengetwe ndaĩa?
-
Nĩ meko ta meva, na ndeto ta syĩva itonya kũtuma kĩla ũmwe wenyu ew’a atanengetwe ndaĩa?
MAŨNDŨ MATONYA KŨŨTETHEESYA
-
Andĩka maũndũ atatũ ũtonya kwenda kwĩkwa mekwonany’a nũnengetwe ndaĩa. Ũla ũtwaanĩte nake eke oou o nake. Mwamina, kĩla ũmwe anenge ũla ũngĩ kĩla waandĩka na ũitata kwĩka maũndũ ala mawetwa nĩ ũla ũtwaanĩte nake.
-
Andĩka maũndũ maseo ala ũla ũtwaanĩte nake wĩkaa na wĩw’aa ũyendeew’a nĩmo. Na ĩndĩ ũimũtavya kana nũtanĩthaw’a nĩ maũndũ asu.
“Kũmũnenga mũũme wakwa ndaĩa kwendaa nonany’e na meko kana nĩnĩmwonaa e wa vata na nĩnendaa ethĩwe e mũtanu. Tyo nginya kĩla ĩvinda ngekaa maũndũ manene, ĩndĩ o na tũmaũndũ twingĩ tũnini no twonany’e kana nĩnĩmũnengete ndaĩa kuma ngoonĩ.”—Megan.
Ũndũ ũla wa vata ti ethĩwa nĩwĩw’aa ũnengete ũla ũtwaanĩte nake ndaĩa, ĩndĩ nĩ ethĩwa ũsu ũtwaanĩte nake nĩwĩw’aa ũmũngete ndaĩa.
MWOLOOTO WĨ MBIVILIANĨ: “Ĩvw’ĩkei ĩnee na wendo mwingĩ, ũseo, wĩnyivyo, ũuu, na wũmĩĩsyo.”—Akolosai 3:12.
