ЗЭЩХЬЭГЪУСЭХЭМ ПАПЩІЭ
3 Фи зэхуаку пщІэ дэлъыныр
СЫТ АБЫ КЪИКІЫР?
Зэщхьэгъусэхэм я зэхуаку пщІэ дэлъмэ, я еплъыкІэхэр щызэтемыхуэм дежи, лъагъуныгъэ ягъэлъагъуэ. «Фи нэчыхьыр нэхъ быдэ зыщІыну чэнджэщипщІ» жыхуиІэ тхылъым щыжыІащ: «Унагъуэм пщІэ илъмэ, зэщхьэгъусэхэм ерыщагъ ягъэлъагъуэу хэкІыпІэншэ хъу Іуэхугъуэ иувэнукъым. Абыхэм я еплъыкІэр щызэтемыхуэ упщІэр зэпкърах, пщІэ хэлъу зым жиІэм адрейр йодаІуэ икІи зэгъусэу хэкІыпІэ къалъыхъуэ» (Ten Lessons to Transform Your Marriage).
БИБЛИЕМ ИТ ПРИНЦИПЫР: «ФІылъагъуныгъэм... езым и щхьэм и фІагъ къилъыхъуркъым» (1 Коринф 13:4, 5).
«Си щхьэгъусэм пщІэ зэрыхуэсщыр къызогъэлъагъуэ ар лъапІэу зэрыслъытэмкІэ икІи абы е ди нэчыхьым зэран хуэхъун гуэр зэрызмыщІэмкІэ» (Майк).
АБЫ МЫХЬЭНЭ ЩІИІЭР
Унагъуэм пщІэ имылъмэ, зым зыр егъэкъуаншэ, псалъэ дыдж жреІэ икІи и пщІэр иреудых. Психологхэм зэрыжаІэмкІэ, апхуэдэ зэхущытыкІэм нэчыхьыр къутэжыным ухуешэ.
«Уи щхьэгъусэм узэрыщыдыхьэшхым абы и гум уІэгъэ трилъхьэфынущ, дзыхь къыпхуимыщІыжыну ищІыфынущ икІи фи нэчыхьыр зэтрикъутэфынущ» (Брайан).
СЫТ ПЩІЭ ХЪУНУР?
ЗЭУПЩІЫЖ
Уи псалъэхэмрэ уи щытыкІэмрэ зы тхьэмахуэкІэ кІэлъыплъыжи, итІанэ зэупщІыж:
«Си щхьэгъусэр нэхъыбэу згъэкъуаншэрэ хьэмэрэ нэхъыбэу сыщытхъурэ?»
«Си щхьэгъусэм пщІэ зэрыхуэсщІыр сыт къызыхэщыр?»
ЗЭГЪУСЭУ ФЕГУПСЫС
Уи щхьэгъусэм пщІэ къызэрыпхуищІыр зыхэпщІэн щхьэкІэ, сыт абы къыбжиІэн икІи къыпхуищІэн хуейр?
Уи щхьэгъусэм пщІэ къызэрыпхуимыщІыр сыт хуэдэ и псалъэхэмрэ и ІуэхущІафэхэмрэ къыхэщрэ?
ЧЭНДЖЭЩХЭР
Уи щхьэгъусэм нэхъыбэу пщІэ къыпхуищІыну уздыхуей лъэныкъуищым теухуауэ тхы. Уи щхьэгъусэми ар дыдэр ищІэну елъэІу. Фтхар зэІэпыфхи, уи щхьэгъусэр зыхуейр зэрыхуэпщІэным иужь ит.
Уи щхьэгъусэм хэлъ хьэл-щэн дахэ удэзыхьэххэр тхы. А хьэл-щэнхэр лъапІэу зэрыплъытэр абы жеІэ.
«Уи щхьэгъусэм пщІэ хуэпщІмэ, уи ІуэхущІафэхэмкІэ къэбгъэлъэгъуэнущ ар лъапІэу зэрыплъытэр икІи ар насыпыфІэу щытыну узэрыхуейр. И нэхъыбэм махуэ къэс длэжь Іуэхугъуэ цІыкІухэращ пщІэр къызыхэщыр, атІэ игъащІэм зэ тщІа Іуэхугъуэшхуэ гуэрыракъым» (Меган).
Аращи, мыхьэнэ зиІэр уэ пщІэ бгъэлъагъуэу къызэрыплъытэракъым, атІэ а пщІэр уи щхьэгъусэм зыхищІэрэ зыхимыщІэрэщ.
БИБЛИЕМ ИТ ПРИНЦИПЫР: «ГущІэгъунри, фІыгъуэри, мыпэгэнри, гущабагъэри, шыІэныгъэри фи гум ивгъэлъ» (Колоссэ 3:12).
