សម្រាប់ប្ដីប្រពន្ធ
៣ ការគោរព
តើមានន័យយ៉ាងណា?
បើគូចេះគោរពគ្នាទៅវិញទៅមក ពួកគេនឹងយោគយល់គ្នាសូម្បីតែពេលពួកគេមិនយល់ស្របគ្នាក្ដី។ សៀវភៅមួយចែងថា៖ «ប្ដីប្រពន្ធទាំងនេះជៀសវាងស្ថានភាពដែលនាំឲ្យពួកគេមិនព្រមស្រុះស្រួលគ្នា។ ដូច្នេះពួកគេនិយាយគ្នាដើម្បីដោះស្រាយការខ្វែងគំនិតដែលពួកគេមាន។ ដោយយកចិត្តទុកដាក់ ពួកគេស្ដាប់ទស្សនៈរបស់គូ ហើយពួកគេព្រមព្រៀងគ្នាដោយពេញចិត្តទាំងសងខាង» (Ten Lessons to Transform Your Marriage)។
គោលការណ៍គម្ពីរ៖ «សេចក្ដីស្រឡាញ់ . . . មិនរកប្រយោជន៍ផ្ទាល់ខ្លួន»។—កូរិនថូសទី១ ១៣:៤, ៥
មីកានិយាយថា៖ «ខ្ញុំគោរពប្រពន្ធរបស់ខ្ញុំដោយឲ្យតម្លៃនាង ហើយខ្ញុំមិនធ្វើបាបផ្លូវចិត្តរបស់នាង ឬធ្វើអ្វីដែលបង្ខូចចំណងអាពាហ៍ពិពាហ៍របស់យើងឡើយ»។
ហេតុអ្វីសំខាន់?
បើគូម្នាក់ៗមិនគោរពគ្នា ការសន្ទនារបស់ពួកគេអាចទៅជាពាក្យរិះគន់ ពាក្យចំអក ឬពាក្យមើលងាយមើលថោកគ្នា។ អ្នកស្រាវជ្រាវនិយាយថាបើប្ដីប្រពន្ធធ្វើដូច្នេះ នោះគឺជាសញ្ញាសម្គាល់ដំបូងដែលនាំឲ្យឈានទៅដល់ការលែងលះគ្នា។
ប្រាយអេនរៀបរាប់ថា៖ «ការនិយាយពន្លើស ឬបង្កាច់បង្ខូចអំពីប្រពន្ធ ឬក៏យកប្រពន្ធមកនិយាយលេងសើច គឺមានតែធ្វើឲ្យនាងលែងឲ្យតម្លៃខ្លួនឯង បាត់បង់ទំនុកចិត្តលើយើង ហើយបង្ខូចចំណងអាពាហ៍ពិពាហ៍របស់យើង»។
អ្វីដែលអ្នកអាចធ្វើ
សូមពិសោធអំពីខ្លួនអ្នក
សូមកត់សម្គាល់ការសន្ទនារបស់អ្នកក្នុងរយៈពេលមួយសប្ដាហ៍។ រួចសួរខ្លួនអ្នកថា៖
-
‹តើខ្ញុំរិះគន់គូរបស់ខ្ញុំច្រើនប៉ុណ្ណា ហើយតើខ្ញុំសរសើរគូរបស់ខ្ញុំច្រើនប៉ុណ្ណា?›
-
‹តើខ្ញុំគោរពគូរបស់ខ្ញុំតាមរបៀបជាក់លាក់ណាខ្លះ?›
សូមពិភាក្សាជាមួយគូរបស់អ្នកអំពីសំណួរដូចតទៅនេះ
-
តើការប្រព្រឹត្តនិងពាក្យសម្ដីណាខ្លះដែលជួយឲ្យអ្នកនិងគូរបស់អ្នកមានអារម្មណ៍ថាបានទទួលការគោរព?
-
តើការប្រព្រឹត្តនិងពាក្យសម្ដីណាខ្លះដែលធ្វើឲ្យអ្នកនិងគូរបស់អ្នកមានអារម្មណ៍ថាមិនបានទទួលការគោរព?
យោបល់
-
សូមសរសេរជាបញ្ជីអំពីរបៀបបីយ៉ាងដែលអ្នកចង់ទទួលការគោរព។ គូរបស់អ្នកក៏ធ្វើដូចគ្នាដែរ។ រួចមក សូមផ្លាស់ប្ដូរបញ្ជីគ្នា ហើយព្យាយាមធ្វើតាម។
-
សូមសរសេរអំពីគុណសម្បត្តិឬបុគ្គលិកលក្ខណៈដែលអ្នកចូលចិត្តពីគូរបស់អ្នក។ ក្រោយមក សូមប្រាប់គូរបស់អ្នកថាអ្នកពិតជាឲ្យតម្លៃយ៉ាងខ្លាំងចំពោះគុណសម្បត្តិឬបុគ្គលិកលក្ខណៈទាំងនោះ។
មេហ្គិនប្រាប់ថា៖ «ខ្ញុំគោរពប្ដីខ្ញុំតាមរយៈការប្រព្រឹត្តរបស់ខ្ញុំ។ ខ្ញុំឲ្យតម្លៃគាត់ ហើយថាខ្ញុំចង់ឲ្យគាត់សប្បាយចិត្ត។ គឺមិនតែងតែជាការធ្វើអ្វីធំដុំនោះទេ ជួនកាលអ្វីបន្តិចបន្តួចដែលខ្ញុំធ្វើឬនិយាយសម្រាប់គាត់ គឺអាចបង្ហាញអំពីការគោរពដ៏ស្មោះអស់ពីចិត្ត»។
ជាចុងក្រោយ ទោះជាអ្នកទទួលការគោរពឬមិនទទួល គឺមិនសំខាន់ទេ តែអ្វីដែលសំខាន់គឺធ្វើឲ្យគូរបស់អ្នកមានអារម្មណ៍ថាអ្នកគោរពគាត់។
គោលការណ៍គម្ពីរ៖ «ចូរបំពាក់ខ្លួនដោយសេចក្ដីមេត្តាករុណាដ៏ជ្រាលជ្រៅ សេចក្ដីសប្បុរស ចិត្តរាបទាប ចិត្តស្លូតបូត និងចិត្តអត់ធ្មត់»។—កូឡុស ៣:១២