HEADAVA TAUDIA
3: Hemataurai
ANINA BE DAHAKA?
E hemataurai hehenimu headava taudia na asie lalotamonamu neganai danu, dounu be helalokau hehenimu. Buka ta ladana Ten Lessons to Transform Your Marriage na e gwa: “Headava taudia unu bamodia ese edia ura na basie ha-aukamu. To, adavadia ida edia hekwakwanai na be herevalai heboumu. Adavadia be herevamu neganai mai edia hemataurai ida be hakalamu, bena edia ura be dadaraimu bona dala be tahumu bae lalotamona.”
BAIBUL ENA SISIBA: “Lalokau na . . . sibona ena ḡau se tahumu.”—1 Korinto 13:4, 5.
“Adavagu baina matauraia anina na iena lalohadai baina laloa bada, bona asina uramu ḡau ta baina karaia baina hahisia eiava emai headava baina hadikaia.”—Micah.
DAHAKA DAINAI MAI ANINA BADA?
Bema hemataurai na lasi, tau bona hahine edia herevahereva lalonai be hegwau hehenimu, bona be hekirikirilaimu—hetahu ḡaukara e karamu taudia ese unu kara na e gwauraidia headava ihadikana ḡaudia.
“Bema hereva kahanai adavamu bo gwau heniamu, ladana bo hadikaiamu, eiava bo hevasehalaiamu, una ese ena lalogoada be haoreamu, ena abidadama oiemu ai be haoreamu, bona emui headava danu be hadikaiamu.”—Brian.
DAHAKA BA KARAIA DIBA?
SIBOMU BA HENANADAI
Wiki ta lalonai emu hereva bona kara ba haerodia. Bena sibomu ba henanadai:
-
‘Nega hida adavagu na gwau henia, bona nega hida na hanamoa?’
-
‘Ededia dala haida ai lau ese adavagu imatauraina karana na hahedinaraia?’
ADAVAMU IDA BA HEREVALAI ḠAUDIA
-
Ededia kara bona hereva ese bae durumui, unu amo ba mamia umui na o hemataurai hehenimu?
-
Ededia kara bona hereva amo bo hahedinaraiamu umui na so hemataurai hehenimu?
HEDURU HEREVADIA
-
Pepa ta ai o uramu bae matauraimu daladia toi ba tore. Adavamu danu unu baine kara toma. Bena iena pepa na oi ese bavabia bona oiemu pepa na ia ba henia, bena ba hekwarahi pepa ai e hetore kahadia ai hemataurai karana ba hahedinaraia.
-
Pepa ta ai adavamu enai o moalelaimu karadia ba tore. Bena adavamu ba hamaoroa, unu kara na o moalelai badamu.
“Adavagu baina matauraia anina na egu kara amo baina hahedinaraia ia na na laloa badamu bona na uramu baine moale. Dia ḡau badadia baita kara ai mo ta hahedinaraiamu adavada na ta matauraidiamu, to nega haida ḡau maraḡidia momo baita kara amo baita hahedinaraia diba adavada na ta matauraidia momokanimu.”—Megan.
Ḡau badana na dia oi sibomu ba laloa, oi na o hematauraimu eiava lasi, to namona na adavamu ese baine mamia ia na o matauraiamu.
BAIBUL ENA SISIBA: “Ini na ba hahedokilai: Hebogahisi, gado namo, manau, manada, haheauka.”—Kolose 3:12.
