KEH TAQEH KAXARO
3. Reʼ i ruloqʼil i kaxaro
¿CHAJARIK IRAAJ RUQʼOROM?
Reʼ taqeh inkiyeew ruloqʼil i kikaxaro tiʼ inkikʼraaj kiibʼ, atoobʼ ta maʼ jenaj ta wach inkaaj kibʼanam. Reʼ huuj Diez claves para transformar tu matrimonio iruqʼor: «Reʼ taqeh kaxaro wilih maʼ inchalik ta kikʼah chi riij i kʼahchiʼ kikapaam rubʼaan. Kiqʼorik laʼ chi riij i kikʼaxkilaal. Inkibʼiraj kiibʼ chi kiwach eh inkikorsaj i maʼxta reet chi keh».
NAʼOJBʼAL REH I SANTO LAJ HUUJ: «Reʼ wilik kʼaxooj ruukʼ, […] maʼ xata chi rutkeel i rukʼax riibʼ» (1 Corintios 13:4, 5).
«Yeʼarik ruloqʼil i nukaxarohiil ruukʼ i wehkʼeen iraaj ruqʼorom chi nanukʼaxam i wehkʼeen eh chi maʼ ne ta i nutiʼbʼisaj rukʼux» (Micah).
¿CHAJ WOʼ REET KORUMAN?
Noq reʼ taqeh kaxaro maʼ inkiyeew ta kiloqʼil chi kiwach, inkiqʼoreej kiibʼ chi kow, eh inkikut qʼorik chi kiwach. Reʼ taqeh inkiyeew naʼojbʼal inkiqʼor chi reʼ wilih narukuxik pan chʼaqooj iibʼ.
«Reʼ taqeh qʼorik maʼ holohik taj, reʼ taqeh kutuj qʼorik eh reʼ rukaqseʼeljiik awehkʼeen irutiʼbʼisaj rukʼux eh irubʼan chi maʼ ne ta chik irukoj rukʼux awuukʼ» (Brian).
¿CHAJARIK NE NABʼAN?
CHAKAPAAJ
Chakapaaj chi riij taqeh inaqʼor reh awuchʼihiil eh nikʼwach hat rilom chupaam taqeh xamano ikʼinaq. Chi riij i reʼ chachaqʼweej taqeh pahqaal:
¿Jaruubʼ pech akutum qʼorik chi riij eh jaruubʼ pech ayeʼem rusuqkiil rukʼux?
¿Nikʼwach akʼuhtaam reh, chi inayeew ruloqʼil akaxaro ruukʼ?
TIQʼOROQ RUUKʼ AWUCHʼIHIIL
¿Ahaʼ wilik i qʼorik eh i bʼanooj inqikʼraaj chi ruyeew ruloqʼil i qakaxaro?
¿Ahaʼ wilik i qʼorik eh i bʼanooj inqikʼraaj chi, maʼ ruyeew ta ruloqʼil i qakaxaro?
JUʼJUN NAʼOJBʼAL
Chajuʼjunaal chatzʼihbʼaaj taq ixibʼ naʼojbʼal reʼ imponik naq taq chawach chi ne rubʼan awuchʼihiil. Chaqʼahsaj taq chawach i huuj eh chakoj taq akʼux chi rubʼanariik i xutzʼihbʼaaj awuchʼihiil.
Chatzʼihbʼaaj taqeh i runaʼojbʼal awuchʼihiil reʼ taqeh imponik chawach, eh chaqʼor reh chi looqʼ chaweh akaxaro ruukʼ.
«Yeʼarik ruloqʼil i nukaxarohiil ruukʼ i nubʼahiil iraaj ruqʼorom chi nanukʼuhtaam ruukʼ i nubʼanooj chi looqʼ chi weh, eh inwaaj chi suq rukʼux. Reʼ yeʼarik ruloqʼil i kaxaro xa maʼ rukʼuhtaaj ta ruukʼ i nimaq laj bʼanooj» (Megan).
Pan korik, reʼ koruman maʼ reʼ ta, chi reʼ hat ne nawikʼraaj awiibʼ chi wilik awajaawriik on chi ne inkiyeew aloqʼil reʼ laʼ chi reʼ awuchʼihiil ne irikʼraaj chi looqʼ chaweh eh chi inawaaj wach.
NAʼOJBʼAL REH I SANTO LAJ HUUJ: «Cha aʼn taq i holohik laj naʼojbʼal, reʼ taqe wili: Reʼ i korik laj ketelinik wachiis, reʼ lochʼik, reʼ chaqʼlamiil, reʼ atoobʼ wach kʼuxliis, reʼ rukuyariik i tiʼ kʼaxik» (Colosenses 3:12).
