TOKORUA AKAIPOIPO
3: Akangateitei
EAA TE AITEANGA
Te au tokorua te akaari ra i te tu akangateitei, ka akono raua i tetai e tetai noatu me tupu te tauetono anga. “Kare teia au tokorua e maro ki to raua ua rai manako tukeke,” i karanga ai te puka Ten Lessons to Transform Your Marriage. “Mari ra, ka uriuri kapiti raua i te manamanata tei tupu. Ka akarongo raua ma te akangateitei i te manako o tetai e tetai e ka kimi i te au ravenga kia rotai ta raua ikianga.”
KAVEINGA PIPIRIA: “Kare [te aroa] e kimi i te meitaki nona uaorai.”—1 Korinetia 13:4, 5.
“Me akangateitei au i taku vaine, ka akaperepere au i tona tu e kare au e rave i tetai apinga te ka akakino iaia e to maua akaipoipo.”—Micah.
EAA I PUAPINGA AI
Me kare e akaariia te tu akangateitei, ka tupu te au tuatua akaapa, taakama, e te akangateitei kore i rotopu i te au tokorua akaipoipo—au akairo teia no te tatara i karanga ai te aronga kimi kite.
“Me tuatua koe te au tuatua akakino, aviri, e te viivii no runga i taau vaine, ka tupu te manako puapinga kore kiaia, kare e irinaki ia koe e ka takinoia to korua akaipoipo.”—Brian.
TAAU KA RAVE
TIMATA IA KOE UAORAI
Akamanako i taau i tuatua e i rave. E oti ui kia koe uaorai:
-
‘E maata atu ainei taku akakino anga i toku tokorua, me e maata atu ainei taku akameitaki anga iaia?’
-
‘Eaa taku i rave no te akaarianga i te tu akangateitei ki toku tokorua?’
URIURI KI TOOU TOKORUA
-
Eaa te au angaanga e te au tuatua te ka tauturu i te akangateitei i tetai e tetai?
-
Eaa te au angaanga e te au tuatua te ka akaari i te tu akangateitei kore ki tetai e tetai?
RAVE I TEIA
-
Tata e toru apinga ka inangaro koe kia akaariia te tu akangateitei kia koe. Pati ki toou tokorua kia pera katoa. E oti akara i ta korua i tata kia kite i te au ngai ka anoanoia korua kia akangateitei tetai e tetai.
-
Tata i te au tu taau e reka ra i roto i toou tokorua. E oti akakite kiaia e te akaperepere maata ra koe i tera au tu manea nona.
“Me akangateitei au i taku tane, ka akaari au e te akaperepere ra au iaia na roto i taku ka rave e ka inangaro au kia mataora aia. Kare e tai ua taime; ka akaari putuputu au na roto i te au angaanga rikiriki.”—Megan.
Ko te mea maata, kare kia akaariia te tu akangateitei kia koe; mari ra kia kite toou tokorua e te akangateitei ra koe iaia.
KAVEINGA PIPIRIA: “Ka akangakau aroa ua e te takinga-meitaki, te akaaka, te maru, te akakoromaki maata.”—Kolosa 3:12.