NDALI TI AKOLI NA AWALI
3: Ne mba
TËNË SO AYE TI TENE NYEN?
Akoli na awali so ane mba ayeke pensé na mba, même tongana a si so ala mä terê ape. Mbeni buku (Ten Lessons to Transform Your Marriage) atene: “Ala yeke kpe ti tï na yâ ti mbeni ye so alingbi ti sara si ala ke ti mä terê. Nde na so, ala yeke sara lisoro na ndö ti akpale kue so ala wara. Zo oko oko ayeke duti kpô ti mä mba ti lo na ala yeke gï ti wara ambeni ye so ala use kue alingbi ti mä terê na ndö ni.”
MAMA-NDIA TI BIBLE: ‘Ndoye . . . agi gï aye so anzere na lo pëpe.’—1 aCorinthien 13:4, 5.
“Ti ne wali ti mbi aye ti tene ti hinga so lo yeke na anzoni sarango ye nga ti kpe ti son bê ti lo wala ti buba songo ti mbi na lo.”—Micah.
NGBANGA TI NYEN A YEKE KOTA YE?
Tongana koli na wali ane mba ape, mo yeke bâ so na yâ ti lisoro ti ala, ala peut ti kasa mba, ti tene asioni tënë na mba nga même ti bâ mba tongana ye oko ape. Ambeni wandara atene so mara ti asarango ye tongaso ayeke akozo signe so afa so peut-être na fin ni ala yeke sara divorce.
“Ti tene atënë ti mbana na wali ti mo, ti mû tënë ti lo na sioni ni wala ti he lo ayeke sara si lo bâ so lo peut ti sara mbeni nzoni ye encore ape, lo yeke perdre confiance na mo nga ayeke buba songo ti mo na lo.”—Brian.
YE SO MO PEUT TI SARA
HUNDA TERÊ TI MO
Na nda ti yenga, gbu li na ndö ti aye so mo tene nga na aye so mo sara na yâ ti yenga ni, na hunda terê ti mo:
-
‘Fani oke la mbi kasa koli wala wali ti mbi, nga fani oke la mbi gonda lo?’
-
‘Na yâ ti aye wa la mbi fa so mbi ne lo?’
SARA LISORO NA KOLI WALA WALI TI MO
-
Aye wa la tongana zo asara wala lo tene ayeke sara si mba ti lo abâ so lo ne lo?
-
Aye wa la tongana zo asara wala lo tene ayeke sara si mba ti lo abâ so lo ne lo ape?
AWANGO
-
Sû na lê ti mbeti ambeni ye ota so na yâ ni mo ye ti tene a ne mo. Tene na koli wala wali ti mo ti sara ti ti lo. Ala mû na mba, na zo oko oko agi ti sara ye alingbi na ye so mba ti lo ni afa.
-
Sû na lê ti mbeti asarango ye ti terê ti koli wala wali ti mo so mo ye ni mingi. Nga, fa na lo tongana nyen la mo ye asarango ye ti terê ti lo ni so mingi.
“Ti ne koli ti mbi aye ti tene ti fa na lo na lege ti asarango ye ti mbi so lo yeke kota na lê ti mbi nga so mbi ye si lo duti na ngia. Mingi ni a yeke gï akete ye so mbi tene wala mbi sara la ayeke fa so mbi ne lo biani.”—Megan.
Ti tâ tënë ni, kota ye ni ayeke pëpe ti gi ti bâ wala a ne mo wala a ne mo ape; me a yeke ti gi ti bâ wala koli wala wali ti mo abâ so mo ne lo.
MAMA-NDIA TI BIBLE: “Ala yü tâ bango mawa ti zo, sarango nzoni na zo, sarango terê kete, sarango ye na ngangu pëpe; ala yü nga kangango bê ti ku.”—aColossien 3:12.
