KI HE ONGO MEʻA MALÍ
3: Fakaʻapaʻapa
KO HONO ʻUHINGÁ
Ko e ngaahi hoa mali fakaʻapaʻapá ʻoku nau fetokangaʻaki naʻa mo e lolotonga ha fetōkehekeheʻaki. “Ko e ngaahi hoa mali ko ení ʻoku nau fakaʻehiʻehi mei ha tuʻunga te nau hoko ai ʻo fakafisi ke tukulolo ki he hoa ʻe tahá,” ko e lau ia ʻa e tohi Ten Lessons to Transform Your Marriage. “ʻI hono kehé, ʻoku nau hanganaki fetalanoaʻaki fekauʻaki mo e ngaahi palopalemá. ʻOku nau fanongo anga-fakaʻapaʻapa ki he fakakaukau honau hoa malí pea kumi ki ha meʻa ʻe ʻaonga fakatouʻosi ki he ongo tafaʻakí.”
TEFITOʻI MOʻONI FAKATOHITAPU: “Ko e ʻofá . . . ʻoku ʻikai te ne kumi ki heʻene lelei pē ʻaʻana.”—1 Kolinitō 13:4, 5.
“Ke fakaʻapaʻapaʻi hoku uaifí ʻoku ʻuhingá ko ʻeku fakahoungaʻi hono mahuʻingá pea ʻoku ʻikai te u loto ke fai ha meʻa te ne uesia ia pea mo ʻema nofo malí.”—Micah.
ʻUHINGA ʻOKU MAHUʻINGA AÍ
ʻI he ʻikai ha fakaʻapaʻapá, ko e fetalanoaʻaki ʻa e ongo meʻa malí ʻe hoko ʻo ʻaiʻainoaʻia, fakaanga pea aʻu ʻo taʻetokaʻi—ko e ngaahi ʻulungaanga ʻoku pehē ʻe he kau fakatotoló ko e tomuʻa ngaahi fakaʻilonga ia ki he vete malí.
“Ko hono fai ha ngaahi lea taʻeʻofa, tuku hifo pe fakakata fekauʻaki mo ho uaifí te ne fakavaivaiʻi pē ʻene loto-paú, maumauʻi ai ʻene falalá pea veuki ai hoʻomo nofo malí.”—Brian.
MEʻA ʻE LAVA KE KE FAÍ
SIVISIVIʻI KOE
Tokangataha ki hoʻomo fetalanoaʻakí mo e ngaahi ngāué ʻi ha uike. ʻEke hifo leva:
-
‘Naʻe tuʻo fiha ʻeku faʻa fakaangaʻi hoku hoá, pea naʻe tuʻo fiha ʻeku faʻa fakaongoongoleleiʻi iá?’
-
‘Ko e hā ʻa e ngaahi tafaʻaki pau naʻá ku fakahāhā ai ʻa e fakaʻapaʻapá ki hoku hoá?’
TALANOA MO HO HOÁ
-
Ko e hā ʻa e ngaahi ngāue mo e ngaahi lea te ne tokoniʻi kimoua ke mo fefakaʻapaʻapaʻakí?
-
Ko e hā ʻa e ngaahi ngāue mo e ngaahi lea te ke ongoʻi ai ʻoku taʻefakaʻapaʻapaʻi koé?
FOKOTUʻU
-
Hiki hifo ha founga ʻe tolu te ke saiʻia ke fakahaaʻi atu ai kiate koe ʻa e fakaʻapaʻapá. ʻAi ho hoá ke ne fai ʻa e meʻa tatau. Fakafetongi hoʻomo lisí pea ngāue leva ke fakahāhā ʻa e fakaʻapaʻapá ʻi he tafaʻaki ʻoku ʻasi he lisí.
-
ʻAi ha lisi ʻo e ngaahi ʻulungaanga ʻokú ke saiʻia ai fekauʻaki mo ho hoá. Pea tala ange leva ki ho hoá ʻa e lahi hoʻo houngaʻia ʻi he ngaahi ʻulungaanga ko iá.
“Ke fakaʻapaʻapaʻi hoku husepānití ʻoku ʻuhingá ko ʻeku fakahaaʻi ʻi heʻeku ngāué ʻoku ou fakamahuʻinga ia pea loto ke ne fiefia. ʻOku ʻikai faʻa fiemaʻu ia ke fai ha fuʻu ngāue lahi; ka ʻi he taimi ʻe niʻihi ko ha fanga kiʻi ngāue hokohoko ʻe lava ke fakahaaʻi ai ʻa e fakaʻapaʻapa moʻoní.”—Megan.
ʻI hono aofangatukú, ko e meʻa ʻoku mahuʻingá pe ʻoku ongoʻi ʻe ho hoá ʻoku fakaʻapaʻapaʻi ia kae ʻikai ke fakatuʻunga ʻi hoʻo pehē ʻokú ke anga-fakaʻapaʻapá.
TEFITOʻI MOʻONI FAKATOHITAPU: “Mou kofuʻaki kimoutolu ʻa e manavaʻofa kaungāongoʻi loloto, anga-lelei, anga-fakatōkilalo, anga-malū, mo e kātaki.”—Kolose 3:12.
