TA STOJOL TE MACHʼATIK NUJPUNEMIK
3: Ichʼa abaik ta mukʼ
¿BIN SMAKOJBEY SKʼOPLAL?
Te machʼatik nujpunemik te ya yichʼ sbaik ta mukʼ ya skanantay sbaik ta lek, manchukme ay banti ma acuerdo ayik-a. Te libro Diez claves para transformar tu matrimonio jich ya yal: «Maba ya spasik tulan ta skoltaybeyel skʼoplal te bin ya skʼan yoʼtanik ta jujuntul. Te bin ya spasik, jaʼ te ya slebeyik schajpajibal te kʼope. Talel kʼaxel ya yaʼiybey sbaik te skʼopik sok jaʼ ya sleik te bin ya xkoltayotik ta schebalik».
TE BIN YA YAL TE BIBLIA: «Te kʼuxul oʼtanil [...] ma jaʼuknax ya sle yutsil slekil stukel» (1 Corintios 13:4, 5).
«Ya kakʼ ta ilel te ay skʼoplal ta koʼtan te kinam te kʼalal ya kichʼ ta mukʼ sok maʼyuk bin ya jpas te ya yutsʼinbey yoʼtan o te ya yutsʼin te jnujpuneltike» (xchi te Micah).
¿BIN YUʼUN TE BAYAL SKʼOPLAL?
Te kʼalal ma xyichʼ sbaik ta mukʼ, jaʼnax ya yalbey sbaik te bin ma lekuk ta aʼiyel, ya slaban sbaik, hasta ya yalbey sbaik te bin kʼux ta aʼiyele. Ay machʼatik ya yalik te kʼalal jich ya xkʼot ta pasele tey chikan ta ilel te ya xlaj skʼoplal te snujpunelike.
«Kʼalal te winik ma lekuk te bin ya yalbey te yinam, ma stojiluk ya yalbey te sfalta o ya slaban, yame yutsʼinbey yoʼtan. Jich ma xyakʼix smukʼul yoʼtan ta stojol» (xchi te Brian).
¿BIN YA XJUʼ YA APAS?
JOJKʼOYBEYA ABA INI:
Jultesa ta awoʼtan bin yilel kʼopojemat sok te ajoy sok te bin yilel atalel awakʼoj ta ilel ta stojol te semana te kʼaxeltoe. Ta patil, akʼbeya sujtib te jojkʼoyeletik ini:
-
¿Jayeb buelta la awalbey te smul sok jayeb buelta ay bin lek la apas ta stojol o ay bin la kʼebanbey?
-
¿Bintik-utʼil la awakʼ ta ilel te la awichʼ ta mukʼe?
ILBEYAIK SKʼOPLAL TA ACHEBALIK INI:
-
¿Bintik-a te ya kaltik sok te ya jpastik te ichʼbil ta mukʼ ya kaʼiy jbatik yuʼune?
-
¿Bintik-a te ya kaltik sok te ya jpastik te ma ichʼbiluk ta mukʼ ya kaʼiy jbatik yuʼune?
PASA AWIL INI:
-
Achebalik tsʼibayaik ta jun lista oxeb te bin-utʼil ya akʼanik te ya awichʼik ichʼel ta mukʼ. Talel kʼaxel ilawilik te bin la atsʼibayik sok pasaik tulan ta spasel te bin ya skʼan te ajoye.
-
Pasa jun lista yuʼun spisil te tʼujbil taleliletik ay yuʼun te ajoye sok albeya te bayal skʼoplal ta awoʼtan.
«Ya kakʼ ta ilel te ya kichʼ ta mukʼ te jmamalal te kʼalal ya kakʼbey yil te bayal skʼoplal ta koʼtan sok te ya jkʼan te tseʼeluk yoʼtane. Ay ma puersa te kʼax mukʼ te bin ya jpastik ta stojol te joytik yuʼun ya kakʼbeytik yil te ya kichʼtik ta mukʼ» (xchi te Megan).
Ma jaʼuk tulan skʼoplal te ya akuy te ya awichʼ ta mukʼ te ajoye, jaʼ tulan skʼoplal te ichʼbiluk ta mukʼ ya yaʼiy sba awuʼune.
TE BIN YA YAL TE BIBLIA: «Lapaik te yutsil kʼuxul oʼtanil, te lekil oʼtanil, te pekʼel oʼtanil, te manso-oʼtanil sok te lamal oʼtanil» (Colosenses 3:12).
