SVENTA NUPULTSʼAKAL
3. Ichʼo abaik ta mukʼ
¿KʼUSI SMAKOJ?
Li nupultsʼakaletik ti yichʼoj sbaik ta mukʼe oy ta yoʼonton sbaik akʼo mi mu jmojuk kʼusi tsnopik. Xi chal li livro Diez claves para transformar tu matrimonio: «Li nupultsʼakaletike maʼuk ti jpʼel xa xalik xchiʼuk ti mu xa xjel li kʼusi tsnopike. Yuʼun tsloʼil- taik li kʼusi mu koʼoluk tsnopike, chchikintabe sbaik xchiʼuk jaʼ tspasik li kʼusi jun˗o yoʼonton chkom xchaʼvoʼalike».
BEILTASEL TA VIVLIA: «Li kʼanelale [...] maʼuk tsaʼ li kʼusi lek chaʼi stuke» (1 Korintios 13:4, 5).
«Kʼalal oy sbalil chkil li kajnil xchiʼuk muʼyuk ta jpas li kʼusi chopol chaʼi˗o sbae, jaʼ jech chkakʼ ta ilel ti kichʼoj ta mukʼe» (Micah).
¿KʼU YUʼUN TSOTS SKʼOPLAL?
Kʼalal muʼyuk bu chichʼ sbaik ta mukʼ li nupultsʼakaletike, xuʼ me tslaban sbaik xchiʼuk tsyayijesvan li kʼusi chalbe sbaike. Li buchʼutik chchanbeik skʼoplal nupunele chalik ti buchʼutik jech chlik skʼopike xuʼ xil˗o svokolik o chtuchʼ˗o snupunelik.
«Mi chopolik kʼusitik chaval, mi chababakʼopoj o chalabanvane, muʼyuk xa me sbalil chaʼi sba avuʼun li avajnile, vaʼun muʼyuk xa me tspat yoʼonton ta atojolal» (Brian).
¿KʼUSI STAKʼ XAPAS?
NOPBO SKʼOPLAL LIʼE:
Nopbo skʼoplal ti kʼu yelan la achiʼin abaik ta loʼil xchiʼuk anup achiʼil li echʼ tal xemanae. Mi laje, xi xajakʼbe abae:
-
¿Jayib velta laj kalbe ti muʼyuk lek li kʼusi tspase xchiʼuk jaykoj velta la jkʼupil kʼopta?
-
¿Kʼu yelan laj kakʼ ta ilel ti kichʼoj ta mukʼe?
LOʼILTAO XCHIʼUK ANUP ACHIʼIL LIʼE:
-
¿Kʼu yelan ta jkʼantik kʼoponel xchiʼuk pasbel sventa ichʼbiluk ta mukʼ xkaʼi jbatike?
-
¿Kʼusitik chkichʼtik albel o pasbel ti muʼyuk bu ichʼbil ta mukʼ chkaʼi˗o jbatike?
LI KʼUSI XUʼ XAPASE
-
Ta jujuntal tsʼibaik ta jlikuk vun oxtos ti kʼusi ichʼbil˗o ta mukʼ chavaʼi abaike. Jelbo abaik li vune xchiʼuk akʼo persa spasel li kʼusi lek chaʼi li anup achiʼile.
-
Pasbo junuk slistail li stalelaltak ti lek chavilbe li anup achiʼile xchiʼuk albo ti tsots skʼoplal chavile.
«Chkichʼ ta mukʼ jmalal kʼalal chkakʼ ta ilel ti ep sbalil chkile xchiʼuk ti ta jkʼan ti xmuyubaje. Mu persauk ep kʼusitik ta jpas o xkalbe yoʼ xkakʼbe yil ti kichʼoj ta mukʼe» (Megan).
Li kʼusi tsots skʼoplale maʼuk ti jnaʼ xij˗ichʼvan ta mukʼ chkaʼi jbatike, jaʼ mi ichʼbil ta mukʼ chaʼi sba li jnup jchiʼiltike.
BEILTASEL TA VIVLIA: «Lapik me li smukʼul xkʼuxul avoʼontonike, li slekil avoʼontonike, ti bikʼit chavakʼ abaike, ti manxoukoxuke xchiʼuk tsʼikuk me avuʼunik» (Kolosenses 3:12).
