Ŵandu ŵalombane ŵakusachimbichisyana akusatenda yindu mwakuganichisyana, atamose patindene nganisyo. Buku jine jatite, “Maŵasa gelega ngagakusaleka kutendela yindu pampepe. Nambo gakusapitilisya kukambilana ya kutindana nganisyo kwakupali pasikati pawo. Jwalijose akusaŵa jwakupikanila pakuŵecheta mjakwe, mpaka akusayika pakamulana chindu chimo.”—Ten Lessons to Transform Your Marriage.

MFUNDO JA M’BAIBULO: “Chinonyelo . . . changatenda yakusaka yakwepe.”—1 Akolinto 13:4, 5.

Micah jwatite, “Ngusinachimbichisya ŵamkwangu mwakwayamichila ndamo syawo syambone syakwete soni ngusaŵambala kutenda yindu yampaka yakuŵasye nambosoni yampaka yijonanje liŵasa lyetu.”

Naga ŵalombane ngakuchimbichisyana, akusatanda kuŵechetelana yining’a, kusisyana, nambosoni kuchembulusyana. Ŵakuwungunya apatile kuti yitendo yeleyi mpaka yitendekasye kuti ulombela umale.

Brian jwatite, “Naga ŵalombane akusaŵechetana maloŵe gakunyosyana kapena gakwelegulana mpaka yitendekasye kuti aleche kulupililana.”

ALIWUNGUNYE

Kwa chijuma chimo alolechesye katende kawo ka yindu soni yakusati pakutagulilana. Kaneko aliwusye kuti:

• ‘Ana kalingwa kanaŵechetele ŵamkwangu maloŵe gakusisya? Nambi kalingwa kanayamichile?’

• ‘Ana ŵamkwangu nalosisye kuti ngusinachimbichisya m’matala gapi?’

AKAMBILANEJE NI ŴAMKWAWO

• Ana maloŵe gapi soni yitendo yapi yampaka yatendekasye ŵamkwawo kulipikana kuti akusiŵachimbichisya?

• Ana ni yitendo yapi soni maloŵe gapi gagakusatendekasya jwalijose kulipikana kuti ngakupochela uchimbichimbi?

ALINJE KUTENDA AYI

• Ana akusasaka kuti apocheleje uchimbichimbi m’matala gapi? Alembe matala gatatu. Nombe nawo ŵamkwawo atende myoyo. Pachalembepo, jwalijose ampe mjakwe yalembileyo. Kaneko atande kulosyana uchimbichimbi m’matala galembilego.

• Alembe ndamo syambone syakusasangalala nasyo mwa ŵamkwawo. Kaneko ŵasalile ŵamkwawo kuti akusayamichila mnope ligongo lya ndamo syelesi.

Megan jwatite, “Ngusinachimbichisya ŵamkwangu mu yitendo yangu, pakwalosya kuti ali ŵakusosekwa mnope soni ngusasaka kuti aŵeje ŵakusangalala. Yindu yamwanamwana yangusinatendela kapena kuŵecheta ni yayikusalosya uchimbichimbi.”

Ngani jikagambaga kuŵa kulola naga tukusapochela uchimbichimbi. Nambo tulolejesoni naga ŵamkwetu akusalipikana kuti akusapochela uchimbichimbi.

MFUNDO JA M’BAIBULO: “M’wale chanasa chekulungwa, umbone mtima, kulinandiya, kufasa, soni kuwusimana mtima.”—Akolose 3:12.