Ja yajel perdon jani yajel ekʼ chaʼan jun jasunuk mi lek kʼulajikitik sok mi snoljel tajkel. Ja it mi wa stojolan mi oj ilxuk chaʼanyabʼal ja jas ekʼeli ma sjejel lajansok mi ekʼeluk.

RASON BʼA BIBLIA: «Moka waʼexkan stekʼjela bʼajex sok yajela bʼajex perdon sok spetsanila kʼujolex ama ja juni ayiʼoj rason bʼa oj ya parte sbʼaja smoji» (Colosenses 3:13).

«Yajni ay maʼ waxa kʼana, mini jaʼuk wa xwaja kʼujol ja bʼa spaltaʼiki, jani ja bʼa janekʼ wa skʼujolan bʼa oj tojbʼuki» (Aaron).

Snoljel tajkel ojni bʼobʼ ya koʼan chamel sok oj sjom ja bʼa jastal xa wabʼ aya, sok ojni bʼobʼ sjom jawa nupaneli.

«Jun ekʼele, ja jtatami skʼanaki perdon yuj jun jasunuk bʼa jel syajbʼeson. Ama wokol kabʼ yajel perdon, pe jkʼulaniʼa. Ja jas wa xnaʼa malaya jani yuja mi tixta kaʼa perdoni. Ja jnupaneltikoni mini oj yiʼ mas wokol ajyi» (Julia).

PAKLA ABʼAJ

Yajni jawa nup skʼulan jun jasunuk bʼa wa syajbʼesa, pensaran ja it:

• ¿Jel maʼ wego syajbʼesa yuj chikan jasunuk?

• ¿Tʼilan maʼ waxa kʼana oj skʼanawi perdon, ma oja wakan aʼekʼ jachuk?

BʼA LOʼILANEL SOKA WA NUPI

• ¿Janekʼ wa x-albʼi bʼa tito oj kaʼ jbʼajtik perdon?

• ¿Jasa oj bʼobʼ jkʼuluktik bʼa tixta oj kaʼ jbʼajtik perdon?

JA JAS OJ BʼOBʼA KʼULUK

• Yajni wa syajbʼesa jawa nupi, moka pensaraʼuk ta yuj gana skʼulan.

• Abʼan stojol jawa nupi, ajuluka kʼujol ke «kibʼanaltik wa xleʼa jmultik [ma wa xkʼulantik bʼa mi stojoluk] jitsan ekʼele» (Santiago 3:2).

«Mini wokoluk akʼwanel perdon yajni jchawaniltik ay jmultik, pe mastoni wokol yajni wa xkilatik lajansok kechan june ja maʼ ay smuli. Bʼa yajel perdon june, tʼilani chʼin oj kaʼ jbʼajtik» (Kimberly).

RASON BʼA BIBLIA: «Leʼa modo stojbʼesel yajni bʼejto ayexi» (Mateo 5:25).