Ni aw n’aw denw bɛ aw hakilinaw ni aw kɔnɔkow fɔ ɲɔgɔn ye, o kɔrɔ ye ko kumaɲɔgɔnya lakika bɛ aw ni ɲɔgɔn cɛ.

Kumaɲɔgɔnya bɛ se ka gɛlɛya kɛrɛnkɛrɛnnenya la ni funankɛninw ye. A bɛ se ka kɛ ko a ma mɛn kosɛbɛ ‘i den tun bɛ to ka a ka kow bɛɛ fɔ i ye’ gafe dɔ y’o fɔ min tɔgɔ ye ko Breaking the Code. ‘Nka sisan ikomi a tɛ fosi fɔ i ye bilen, a bɛ iko i sigilen bɛ ten dɔrɔn ka a ka kow lajɛ.’ Nka hali ni u ka ko kɛcogow t’a jira ko u b’a fɛ ka kuma, o waati yɛrɛ de la funankɛninw mago bɛ kumaɲɔgɔnya la kosɛbɛ.

Waati min bɛ bɛn i den ma, a lamɛn o waati la. Hali ni i den b’a fɛ ka kuma i fɛ sukolenba de, a’ ye kuma o waati la.

“O waatiw la, a bɛ se ka kɛ ko i b’a fɛ ka a fɔ i den ye ko: ‘An ye tile bɛɛ kɛ ɲɔgɔn kan, sisan de i b’a fɛ ka kuma?’ Nka ni i den b’a fɛ ka kuma i fɛ, ka a kɔnɔ dayɛlɛ i ye, yala i ka kan ka ban o ma wa? Yala bangebaa bɛɛ t’a fɛ a den ka a kɔnɔ dayɛlɛ a ye wa?”—Lisa.

“Hali ni a ka di ne ye ka da joona, ne ni n’ka funankɛninw ka baro duman caman kɛra minui tɛmɛnnen kɔfɛ de.”—Herbert.

BIBULU SARIYAKOLO: “Mɔgɔ si kana a yɛrɛ nafa ɲini, fɔ mɔgɔ wɛrɛ nafa.”—1 Kɔrɛntekaw 10:24.

I kana a to fɛn fosi ka i bali ka i den lamɛn ka ɲɛ. Denfa dɔ y’a fɔ ko: “Ni ne denw bɛ ka kuma ne fɛ, ne bɛ dɛsɛ ka u ka kuma faamu ka ɲɛ bawo ne hakili bɛ kɛ fɛn wɛrɛ la. Wa u b’a faamu ko ne tɛ ka u ka kuma lamɛn ka ɲɛ!”

N’i y’a ye ko o ɲɔgɔn bɛ to ka i sɔrɔ n’i den bɛ ka kuma i fɛ, tele faga ani ka fɛnw mabɔ i la minnu bɛ se ka i bali ka a lamɛn ka ɲɛ. A bɛ ka min fɔ o lamɛn ka ɲɛ: ko min bɛ k’a jɔrɔ, o nafa ka kan ka bonya i bolo kosɛbɛ hali ni e fɛ o tɛ ko ɲɛnama ye.

“An ka kan ka a jira an ka denmisɛnninw na ko u kɔnɔkow nafa ka bon an bolo. Ni an ma o jira u la, u tɛna u kunkow fɔ an ye walima u bɛ laban ka dɛmɛ ɲini mɔgɔ wɛrɛw fɛ.”—Maranda.

“Kana dimi hali ni i den hakilinaw tɛ hakilina ɲumaw ye.”—Anthony.

BIBULU SARIYAKOLO: “A’ ye aw ka lamɛnni cogo dɔn.”—Luka 8:18

Aw bɛ waati minnu sɔrɔ ka kɛ ɲɔgɔn fɛ don o don, a’ ye kuma o waatiw la. Tuma dɔw la, denmisɛnninw ka telin ka u kɔnɔkumaw fɔ, ni u sigilen tɛ ka u ɲɛsin u bangebaa ma.

“Ni an bɛ mɔbili kɔnɔ ka taga yɔrɔ dɔ la, an bɛ o waatiw ta ka kuma bawo mɔbili kɔnɔ, an bɛ sigi ɲɔgɔn kɛrɛfɛ de, an tɛ an sigi ka an ɲɛsin ɲɔgɔn ma, o b’a to an ka se ka baro kɛ ka ɲɛ.”—Nicole.

Dumuni kɛ tumaw fana ye baro dumanw kɛ waati ɲuman ye.

“Ni an bɛ surɔfana dun waati min na, an bɛɛ kelen kelen b’a ɲɛfɔ min kɛra an ka tile kɔnɔ ni a diyara walima ni a ma diya. An bɛ o min kɛ don o don, o bɛ an gɛrɛn ɲɔgɔn na ani k’a dɔn ko an bɛɛ bɛ se ka an jigi da ɲɔgɔn kan gɛlɛyaw kɔnɔna na.”—Robin.

BIBULU SARIYAKOLO: “Mɔgɔw bɛɛ ka lamɛnni kɛ joona nka u kana kuma joona.”—Yakuba 1:19.