BANI NAMATORAS
5: Marsahapi
AHA DO ARTINI
Anggo ra nasiam pakon niombahmu marsipatugahan aha na ibagas pingkiran ni nasiam ampa sonaha pangahap ni nasiam, on patuduhkon boi do dear nasiam marsahapi.
MASE PONTING ON
Sanggah etek ope niombahmu, ganup do isaritahon sidea bamu. Tapi dob konsi remaja lang be sonai sidea. Halani ai, gabe sunsah ma ham mangarusi pingkiran ampa pangahapni. Tapi age pe sonai, sasintongni porlu tumang do niombahmu ai marsahapi pakon nasiam.
NA BOI IBAHEN NASIAM
Sirsir ma mambere panorang sanggah niombahmu sihol marsahapi pakon nasiam. Ra, dobkonsi tongah borngin baru pe ra niombahmu marsahapi pakon nasiam.
“Ra do sonon ihatahon hita, ‘Bah, mase baru sonari ho ra marsahapi? Hape sadarion torus do ho rap pakon Mamak!’ Tapi anggo ra niombahta marsarita hubanta, domma dear ai. Ganup do namatoras sihol ase niombahni ra marsarita hubani sidea.”—Si Lisa.
“Sasintongni lang marosuh ahu maborngintu modom. Tapi sadokah on hupardiateihon rosuhan do niombahku marsahapi pakon ahu dob tongah borngin.”—Si Herbert.
BIBEL MANGKATAHON: “Ulang ma marsisarihon na bani dirini bei, tapi na bani hasoman ma.”—1 Korint 10:24.
Dear ma tangihon niombahmu. Sada bapa mangkatahon, “Sipata sanggah marsarita niombahku, ra do na legan na hupingkirhon. Hape mintor ibotoh sidea do ai. Lang boi huoto-otoi sidea!”
Ongga do homa sonai ham? Sanggah marsarita niombahmu, pamatei ma TV janah ulang ma sai itorihi ham henponmu. Dear ma tangihon ia, age pe iahap ham hira na lang ponting do na isaritahonni ai.
“Maningon ipapos hita do uhurni niombahta anggo hita parduli bani sidea. Anggo lang, ra do lang ra sidea marsahap-sahapi pakon hita, atap ra do hubani halak na legan sidea mangindo pangurupion.”—Si Maranda.
“Ulang ma mintor manggila ham age pe lepak cara marpingkir ni niombahmu ai.”—Si Anthony.
BIBEL MANGKATAHON: “Paruhurhon ma sonaha pambogeinima.”—Lukas 8:18, Terjemahan Dunia Baru, NW.
Ulang ma seriustu sanggah marsarita. Sipata urahan do iahap niombah patugahkon na ibagas uhurni anggo lang seriustu hita marsarita.
“Imanfaatkon hanami do panorang sanggah i mobil. Sanggah ai, urah do ia patugahkon na ibagas uhurni hubangku.”—Si Nicole.
Boi do homa santai nasiam marsahap-sahapi sanggah rup mangan.
“Bani borngin ni ari, sanggah rup mangan hanami isaritahon hanami do ganup na masa ibagas sadari ai. Halani ai lambin kompak ma hanami janah ibotoh hanami ma sanggah adong masalah sirsir do hanami marsiurupan.”—Si Robin.
BIBEL MANGKATAHON: “Ganup halak, ringgas ma ia manangi-nangi, asok marsahap.”—Jakobus 1:19.
You May Also Like
AJARAN NI BIBEL
Pangurupion bani na Maposo
Pindahi ma podah na boi mangurupi na maposo sanggah dong parsoalan.
