IBUKIA KAARO
5: Te Mamaroro
AE NANONAKI IAI
E karaoaki te maroro raoi ngkana ko kaai ni kaota am iango ao am namakin ngkoe ma natim.
BUKINA NGKAI E KAKAWAKI TE MAMARORO
E kona ni kangaanga riki te mamaroro ma rooro n rikirake. Ngke a uarereke natim ao a kakaongoko bwaai ni kabane. Ma ngkai a a roro n rikirake ao e a karako taetaeia nakoim, ao ko a aki atai aia iango ma aia namakin. Kaanga ai aron ae ko tei n iteran te karaanga ao natim n iterana are teuana. Ma ngkana e riki aei, bon aei raoi te tai ae a rangi ni kainnanoa iai te mamaroro natim!
TE BWAI AE KO KONA NI KARAOIA
Tatauraoi ibukin natim. Tatauraoi ni maroro, e ngae naba ngkana e a bwakanako te tai.
“Tao ko bae ni kani kangai, ‘Ko a tibwa kani maroro ngkai? Ai boni maanra ngai i rarikim!’ Ma ti na kangaa ni ngurengure ngkana a a kani kaotii nanoia natira nakoira? Tiaki anne ae a kakantaningaia kaaro ni kabane?”—Lisa.
“E ngae ngke I kani momoantaai ni matu, ma a nanakoraoi tabeua ara mamaroro ngai ma natiu ae te roro n rikirake imwin te nukanibong”—Herbert.
TE BOTO N REIREI MAN TE BAIBARA: “Ke e tai ukera oini kabwaiana temanna ma temanna, ma e na ukera ae e na kabwaia iai raona.”—1 I-Korinto 10:24.
Tai katabeaiangako. E taku temanna te karo: “E wawarewarenako au iango ngkana a taetae natiu. Ao a bon ataia ae I aki kakauongo irouia!”
Ngkana anne naba arom ao kamatea te TV ao katuka am tablet ke am mobwaao. Ongora raoi n te bae e taekinna natim ao kaotia bwa ko moanibwaia tabeaiangana, e ngae naba ngkana bon tii te bae uarereke.
“Ti riai ni karaui nanoia natira bwa a na ataia ae e kakawaki iroura aia namakin. Ngkana a iangoia bwa e aki kakawaki iroura aia namakin, a na kaini raraomaia i bon irouia ke ni kakaae nako riki buokaia irouia tabemwaang.”—Maranda.
“Tai urarake, e ngae naba ngkana e a rangi ni bure ana iango natim.”—Anthony.
TE BOTO N REIREI MAN TE BAIBARA: “Tarataraa raoi aromi ni kakauongo.”—Ruka 8:18.
Kabonganai taai aika aki baireaki. N tabetai ao a kai kaota riki aia namakin naati ngkana a aki kaai n tekateka ni kaaitara ao ni maroro ma aia karo.
“Ti kabongana raoi ara tai n toka n te kaa. E nakoraoi riki ara maroro ngkana ti kaai n tekateka ao ti aki kaaitara.”—Nicole.
E nakoraoi naba te kakaraki n tain te amwarake.
“N tain te katairiki, ao ti kakarakini baika rangi n nakobuaka ke baika rangi n tamaroa ake a riki n te bong anne, ngaira n tatabemanira nako. E katiteuanaira te waaki aei, ao ti a ataia iai ae tiaki tii ngaira n rinanon te kangaanga.”—Robin.
TE BOTO N REIREI MAN TE BAIBARA: “Waekoa n ongora, [ao] iremwe n taetae.”—Iakobo 1:19.
Ko Bae Naba n Tangira
TE TAUA-N-TANTANI
Maroro ma Natim ae Tebwi Tabun Ana Ririki n Aki Kauntaeka
E tabe ni karikirakea kinaakina natim ae tebwi tabun ana ririki ao e kainnanoa ana karo are e na kona n taekin raoi ana iango nakoina. Ko na kanga ni buokia?
