Monsotre aune nitre rüne tä blite jabe ye abokän ja ruin ño ietre aune töita ño yebätä tätre blite jabe.

Blitadre monso kitera ja gäibiti yebe ye ñaka nuäre. Kukwe yebätä ja nemen ruin ño nitre rüne ie ye tärä Tú no me escuchas, yo no te entiendo tä mike gare krörö: “Monso nämäne kia ngwane, ja nämäne ruin ño ietre, töi nämäne ño ye nämäne mike gare jökrä nunye. Akwa niena ja gäibiti nengwane ja ruin ño ietre, töita ño ye ñaka niena mike gare nunye aune ñaka nuäre nun kräke mikakäre gare jai arato”. Monso ñan tö blitai kwrere rabadre tuin mäi, akwa ye ngwane bäri blitadre ben ye tä ribere jai.

Mä tädre juto monso kukwe nuakäre. Ye tä mike gare blitadre dibire ta kwe mäbe, akwa mäkwe kukwe nuadre jökrä.

“Ruäre mä töta nemen kukwe ne niebätä ie: ‘Rare ni täni keteitibe gwitabe, ¿akwa nengwane batibe mä tö kite blitai?’. Ja ruin ño ie mikadre gare kwe tie ye erere ie ti tö, ¿se ñobätä törbadre blitai tibe ngwane tikwe ñan kukwe nuadre?” (Lisa).

“Ti töta nemen kübiai derebe, akwa kä ruärebiti bäri deu ye ngwane nunta blite bäri kwin jabe monso ben” (Albert).

BIBLIA TÄ KUKWE NE DRIERE: “Nikwe ñan töbikadre jändrän kuin nuenbtä kaibe jakrä, akwa nikwe töbikadre jändrän kuin nuenbtä ni mda mdakrä” (1 Corintios 10:24).

Ñan ja töi mika kukwe madabätä. Ni rüne iti tä niere: “Ruäre ngwane monso tä blite tibe ye ngwane, ti abokän tä nemen töbike kukwe madabätä. Ti ñan tä niara kukwe nuin bökän ye tä gain tibätä”.

Kukwe nini ne erere tärä nemen bare mäbätä ngwane, mäkwe televisión okwä ötate aune teléfono ye mika mentokwäre aune monso tä blite mäbe ye mäkwe kukwe nua. Ye erere ngwane, mä töita niarabätä aune kukwe chi niedre kwe, akwa mäkwe kukwe nuai yebiti rabai gare ie niara ütiäte mä kräke.

“Ja ruin ño monso ie ye ütiäte ni kräke rabadre gare ie ye tä ribere jai. Ye erere ñakare ngwane, niara ñaka ja driei nie o ja di käräi kwe nitre mada ie” (María).

“Monsotre ñan tä kukwe kwin niere ngwane, mun ñan rekwetaka” (Anthony).

BIBLIA TÄ KUKWE NE DRIERE: “Munta ni kukwe nuin ño yebätä töbike” (Lucas 8:18, TNM).

Blitadre kä jökrä ngwane. Ruäre ngwane, käta kwekebe aune ni töita jäme ye ngwane monsotre töta nemen blitai nitre rüne ben.

“Nunta niken basare ye ngwane, nunta blite monsotre ben. Nunta täkäni ja ken ñan gwärere ye ngwane, nunta blite bäri kwin monsotre ben” (Nicole).

Mröta ye ngwane, blita raba kwin jabe arato.

“Nunta mröre keteitibe dere ngwane, dre kwin aune dre ñaka kwin tä nemen bare nunbätä yebätä nunta blite jabe. Nunta ne nuainne käre ye tä ngwen törö nunye, nun ñan raba ja tuin kaibe kukweta nemen nun kisete yebe ye gare nuen” (Robin).

BIBLIA TÄ KUKWE NE DRIERE: “Ni jökrä rabadre ni mada kukwe nuin jötrö ngwarbe, akwa nikwe ñaka blitadre bengwairebe” (Santiago 1:19, TNM).