achhi baatcheet ka matlab hai ki aap aur aapke bachche ek-doosre ko batayen ki aap kya sochte hain aur kaisa mehsoos karte hain.

jaise-jaise bachche bade hote hain, unse baat karna mushkil ho jaata hai. jab woh chhote the, to aapko sabkuch batate the. lekin ab aisa nahin hota. woh apne dil ka darvaza band kar lete hain aur aapko pata hi nahin chalta ki unki zindagi mein kya chal raha hai. aap kitni hi baar unse baat karne ki koshish kyon na karein, woh aapko kuch nahin batate. aise mein shaayad aapko lage ki unse baat karna bekar hai, lekin sach to yah hai ki jab woh is daur se guzar rahe hote hain, tab unse baat karna aur bhi zaroori hota hai.

jab bhi bachche baat karna chahein, unse baat keejiye. agar aapka bachcha der raat ko bhi aapse baat karna chahe, to usse baat keejiye.

“shaayad aapka yah kehne ka man kare, ‘yah koi samay hai baat karne ka? main poore din tumhare saath hi to thi, tab kyon nahin baat ki?’ lekin jab aapka bachcha aapko apne dil ki baat batana chahta hai, to aap usse is tarah baat nahin kar sakte. aakhir sabhi maa-baap yahi to chahte hain ki unke bachche unse baat karein!”​—lisa.

“mujhe der raat tak jaagna pasand nahin, lekin aksar aadhi raat ko hi bachchon ke saath meri achhi baatcheet hoti thi.”​—herbert.

pavitra shastra ki salah: “har koi apne faayde ki nahin balki doosre ke faayde ki sochta rahe.”​—1 kurinthiyon 10:24.

unki baat dhyan se suniye. ek pita kehta hai, “jab bachche mujhse baat karte hain, to kabhi-kabhi mera dhyan unki baaton par nahin, balki kahin aur hota hai. par bachche bhaanp lete hain ki main unki sun nahin raha.”

agar aapke saath bhi aisa hota hai, to apne bachche se baat karte vakt t.v. band kar deejiye, mobile ko ek taraf rakh deejiye. bachche ki baat dhyan se suniye. uski samasya aapko chahe kitni hi chhoti kyon na lage, fir bhi suniye. use jataiye ki uski samasya aapke liye bahot maayne rakhti hai.

“hamein bachchon ko yakeen dilana chaahiye ki hamein unki parvah hai. agar unhein lage ki hamein is baat se koi fark nahin padta ki un par kya beet rahi hai, to woh apne dil ki baat apne dil mein hi dabaye rakheinge ya fir kisi aur ko batayenge.”​—maranda.

“agar bachcha aapse koi aisi baat kahe, jo aapko sahi nahin lagti, to bhadak mat jaaiye.”​—anthony.

pavitra shastra ki salah: “dhyan do ki tum kaise sunte ho.”​—luka 8:18.

koi mauka haath se jaane mat deejiye. kabhi-kabhi bachche maata-pita se tab khulkar baat karte hain jab woh ghar ke kuch kaamkaj kar rahe hote hain, na ki tab jab woh maata-pita ke saath aamne-saamne baithe hote hain.

‘car mein safar karte vakt hamare beech achhi baatcheet hoti hai.’​—nicole.

khaana khaate samay bhi bachchon se baatcheet karne ka achha mauka milta hai.

“raat ko khaana khaate vakt hammein se har koi batata hai ki din-bhar mein uske saath kya achha hua aur kya bura hua. har din is tarah baatcheet karne se hamare beech ekta bani rehti hai aur hum ek-doosre ko ehsas dilate hain ki zindagi ki samasyaon ka saamna karne mein hum akele nahin hain, balki hum sab ek-doosre ke saath hain.”​—robin.

pavitra shastra ki salah: ‘sunne mein furti karein aur bolne mein utavli na karein.’​—yakub 1:19.