Ang matuod nga komunikasyon nagakahulugan sang pagsugiray ninyo sang inyo kabataan sang inyo ginahunahuna kag ginabatyag.

Mahimo mabudlay ang pagpakigkomunikar sa mga tin-edyer. Sang gamay pa sila, ginasugid nila sa imo ang tanan. Pero sang tin-edyer na sila, kis-a na lang sila nagaistorya sa imo, kag wala ka na makahibalo sang ila ginahunahuna kag ginabatyag. Daw ara ka lang nagatindog sa tabok sang suba kag nagatan-aw sa ila. Pero bisan pa amo sini, amo gid ini ang tion nga dapat ka makigkomunikar sa ila!

Mag-adjust kon san-o gusto makig-istorya sang imo bata. Bisan gab-i na, istoryaha sia kon gusto niya.

“Mahimo magsiling ka, ‘Subong ka pa maistorya? Updanay ta bilog nga adlaw!’ Pero ngaa mareklamo kita nga gusto makig-istorya sang aton bata? Indi bala amo gid ina ang gusto sang mga ginikanan?”—Lisa.

“Gusto ko pa tani magtulog, pero gusto sang akon mga tin-edyer nga makig-istorya sa akon kon kaagahon.”—Herbert.

PRINSIPIO SA BIBLIA: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

Indi magpadisturbo. Ang isa ka amay nagsiling: “Kon kaisa, lain ang akon ginapamensar samtang ginaistorya ako sang akon kabataan. Kag nakahibalo gid sila nga wala ako nagapamati!”

Kon amo ka man sini, patya ang TV kag ang imo mga gadyet. Pamatii sing maayo ang ginasiling sang imo bata, kag ipabatyag sa iya nga importante ang iya ginasugid bisan pa daw gamay lang ini nga butang.

“Ginapasalig gid namon ang amon kabataan nga importante sa amon ang ila ginabatyag. Kay kon indi, indi nila ini pag-isugid sa amon ukon basi isugid nila ini sa iban.”—Maranda.

“Indi dayon maakig bisan pa daw sala ang ginasiling sang imo bata.”—Anthony.

PRINSIPIO SA BIBLIA: “Talupangda ninyo kon paano kamo nagapamati.”—Lucas 8:18.

Gamita ang indi pormal nga mga sitwasyon. Kon kaisa, mas mahapos sa kabataan ang pagpakig-istorya sa ila ginikanan kon nagapungko sila nga wala nagaatubangay.

“Ginaistorya namon sila samtang nagasakay sa salakyan. Maayo ang amon pag-istoryahanay kay nagatuparay kami kag wala nagaatubangay.”—Nicole.

Mahimo man makaistoryahanay samtang nagakaon.

“Samtang nagapanyapon kami, ginaistoryahan namon ang pinakamaayo kag pinakamalain nga natabo sa amon sina nga adlaw. Paagi sini, nangin suod kami kag nahibaluan namon nga kon may mga problema kami wala kami nagaisahanon.”—Robin.

PRINSIPIO SA BIBLIA: “Mangin maabtik sa pagpamati [kag] mahinay sa paghambal.”—Santiago 1:19.