ABAL AN TATALÁBCHIK
5. Kit t’ilmátschik k’al a tsakámil
¿JANT’INI’?
Lej exbadh ka t’ilmay a tsakámil abal ka exla’ jant’oj in tsálpayal ani jant’oj in ats’ál.
¿JALE’ TI LEJ EXBADH?
Lej k’ibat ki t’ilmay i tsakámil axi k’wajat ti yejél. An libro Tú no me escuchas, yo no te entiendo in olnál jant’ini’ in ats’ál tam junchikíl an tataláb. Ti biyál, yab k’ibatak ki t’ilmay i tsakámil, pero xowé’ an tsákamchik yabáts in lé’ ti ólchij jawa’ in tsálpayal ani jawa’ in ats’ál. Ejtíl max yabáts in lé’ ka k’wajiy utat k’al tatá’. Ka t’ila’ abal játs xowé’ tam más ti yéjenchal.
¿JANT’OJ A ÉJTOWAL KA T’AJA’?
Ka ots’ówiy a tsakámil tam jajá’ kin le’na’ ti t’ilom. Ka ots’ówiy bélits max kit aklejchik ti t’ilom.
«Junchikíl walám ka le’na’ ka uluw: ¡U k’wajinek tejé’ patal k’icháj ani ¿tik’elej a lé’ ti t’ilom?! Pero max a tsakámil in lé’ tin ólchij jawa’ in ats’ál, ka t’aja’ ti kwéntaj. Játs jawa’ patal an tatalábchik in lé’». (Lisa).
«U kulbetnál kin wayits k’ijilej, pero u t’ajámal ti kwéntaj abal u tsakámil más in kulbetnál ti t’ilom tam lej ákalits» (Herbert).
JAWA’ IN ULAL AN BIBLIA: «Yab ka áliy an alwataláb expidh abal tatá’, jayej an alwataláb abal axi k’e’at» (1 Corintios 10:24).
Ka lej t’aja’ ti kwéntaj jawa’ ti olchal a tsakámil. Jun i tataláb in uluw: «Tam junchikíl, u tsakámil k’wajat tin ólchal jant’oj, ani naná’ in k’wajíl ku tsalpay k’al k’e’at jant’oj, pero jajá’chik in t’ajál ti kwéntaj».
Max tatá’ a t’ajámal antsaná’, ka tepdha’ an televisión ani ka jila’ an celular. Ka lej t’aja’ ti kwéntaj jawa’ k’wajat ti ólchal, antsaná’ ne’ets ka tejwamédhanchij abal jawa’ ti ólchal jayej lej exbadh abal tatá’.
«Lej exbadh abal i tsakámil kin exbay abal i le’ ki tólmiy. Max i, yabáts ne’ets kin lé’na’ ti ólchij jawa’ in ats’ál ani ne’ets kin aliy pil k’al jita’ ti ka tólmiyat» (Maranda).
«Yab kit tsakuy bélits max a tsakámil kin uluw jant’oj axi yab alwa’» (Anthony).
JAWA’ IN ULAL AN BIBLIA: «Ka lej ots’ówiy jawa’ it ólchinal» (Lucas 8:18).
Kit t’ilmátschik ju’támakits. Tam junchikíl an tsákamchik más in kulbetnál kin t’ilmay in tátajchik tam k’wajatk’ij.
«Wawá’ i lej kulbetnál tu t’ilom tam u ne’ets tu belelél. Antsaná’ i tejwamedhál abal i éjtowal ku t’ilmáts k’al i tsakámil ju’támakits ani yab expidh tam u k’wajat ti k’ima’» (Nicole).
Tam it k’apulchik jayej a éjtowal ka t’ilmay a tsakámil.
«Tam u k’apul patal junax, i t’ilál jawa’ i wat’ámal ti naktal a k’icháj. Kom i ujnám ki t’aja’ axé’, i ats’ál abal u k’wajat júnkudh ani abal ets’ey ne’ets ku tolmíxin» (Robin).
JAWA’ IN ULAL AN BIBLIA: «Kwa’al kit k’wajiychik t’ojojodh abal ka ats’a’, ka ko’oy i k’aya’taláb abal kit kawin» (Santiago 1:19).
Puede que también le interese
EXOBCHIXTALÁB AXI KALDHACH TI BIBLIA
Tolmixtaláb abal an kwitól ani an ts’ik’ách
An Biblia in éjtowal kin tólmiy an kwitól ani an ts’ik’ách abal kin támetna’ an k’ibataláb.
