Randau ti manah nya bekunsika asai ati sereta runding entara nuan enggau bala anak.

Berandau enggau anak ke mansang besai, enda senang. Engka suba, nuan ulih tama ngagai pintu ati sida ba barang maya, tang diatu, nuan semina ulih nganti ba luar aja. Kekadang, pintu nya langsung enda dibuka taja pan nuan udah suah ngetuk. Taja pan sida baka ke enggai bejaku, tang kingatka tu meh maya sida amat begunaka randau!

Titihka meh jadual anak nuan, taja pan nuan engka patut berandau enggau iya nyentukka jauh malam.

“Nuan engka madah, “Aku begulai enggau nuan sepemanjai hari! Nama kebuah diatu baru ka madah?” Tang, enda ke apai indai dekaka anak madahka asai ati sida? Nya alai, anang meh mutap.”—Lisa.

“Tinduk nya amat beguna ba aku, tang sekeda peluang ti manah alai aku berandau enggau anak, suah iya pengudah tengah malam.”—Herbert.

PRINSIP BUP KUDUS: “Anang berundingka diri empu aja, tang berunding ke orang bukai.”—1 Korint 10:24.

Anang limpang. Seiku apai ngaku, “Bisi maya iya aku berundingka utai bukai lebuh anak aku benung bejaku. Aku enda ulih nipu sida. Sida ulih meda aku enda fokus maya sida bejaku!”

Enti nya peneleba nuan, tutup meh TV enggau anang megai nama-nama perengka elektronik. Fokus meh ngagai utai ke dipadah anak nuan, lalu dingaka meh sida taja pan utai ke disebut sida baka ke enda penting.

“Tunjukka ngagai anak, asai ati sida amat penting ba kitai. Enti enda, sida deka mendamka penanggul sida, tauka minta tulung ari orang bukai.”—Maranda.

“Anang jampat ringat taja pan chara sida berunding ngengerang salah.”—Anthony.

PRINSIP BUP KUDUS: “Nya alai, pendingka enggau manah.”—Luke 8:18.

Bejaku enggau chara sereta ba endur ti ngena. Kekadang, bala anak senang agi madahka asai ati enti sida enda betunga mua enggau apai indai.

“Kami rindu berandau lebuh dalam kerita. Maya kami duduk berimbai lalu ukai betunga mua, randau kami manah agi.”—Nicole.

Maya makai mega peluang berandau enggau chara ti rileks.

“Lebuh makai malam, kami becherita pasal utai ke jai enggau utai ke manah nyadi dalam sehari nya. Tebiat tu nyerakupka kami, sereta nyedarka kami, kami enda napi penanggul kediri aja.”—Robin.

PRINSIP BUP KUDUS: “Genap iku orang enda tau enda jampat mending, lubah mansutka jaku.”—James 1:19.