Matut mahkai lam ngu ai gaw, kanu kawa hte kashu kasha ni shada da tinang a myit mang sumru ai lam, hkamsha lam ni hpe tsun dan hkat ai hpe tsun ai re.

Laksan hku nna ramma ni hte matut mahkai na matu yak chye ai. Kashu kasha ni gaw shanhte kaji nga ai aten ni hta, lam yawng hpe tsun dan chye ai. Ramma aten du ai shaloi gaw, hpa hpe mung nau n kam tsun dan ai majaw, shanhte a hkamsha lam ni, myit sumru ai lam ni hpe n chye lu ai. Grai tsan gang mat ai zawn re. Teng sha nga yang, dai aten gaw matut mahkai lam kaja na matu ahkyak ai.

Ma ni ga shaga mayu ai aten hta madat ya u. Shana hpang hkrat yang she shaga mayu tim, madat ya u.

“‘Shani tup she arau nga taw ai wa, ya she tsun ra ai ngu?’ ngu na myit hkrup na re. Raitim, kasha ni kaw nna hpaw tsun dan mayu ai lam nga ai hpe gaw mara shagun n mai ai. Dai zawn, tsun dan ai hpe kanu kawa shagu ra sharawng ai.”​—Liza.

“Ngai gaw jau jau yup mayu ai. Raitim, nye a kasha ni hte shana yup tung lai yang she ga atsawm shaga byin ai.”​—Habat.

Chyum Laika Npawt Tara: “Kadai mung tinang akyu n re ai sha, kaga wa a akyu sha tam nga mu.”​—1 Korinhtu 10:24.

Myit hkum bra: Kawa langai ndai hku tsun ai: “Ma ni hte ga shaga nga ai shaloi, nye a myit ni kaga de du mat ai aten ni nga ai. Shanhte hpe n mai masu ai. Shanhte grai chye ai.”

Dai zawn byin chye yang, TV pat da u. Electronic jak rai ni hpe jahkrat da u. Tinang a kasha tsun ai ga gaw kaji kajaw lam sha raitim, atsawm madat ya u.

“Ma ni a hkamsha lam hpe kanu kawa ni akyak shatai ai lam chye shangun u. N rai yang, shanhte a hkamsha lam ni hpe kanu kawa ni hpe n re ai sha, kaga masha ni hpe sha tsun dan mat sana re.”​—Maranda.

“Kashu kasha ni a sawn sumru ai lam ni gaw shut taw tim pyi, laja lana bai hkum htang.”​—Anhtawni.

Chyum Laika Npawt Tara: “Nanhte kaning rai na la myit dai hpe sadi nga mu.”​—Luka 8:18.

Ahkaw ahkang hpe chye la hkra galaw u. Kalang lang kashu kasha ni gaw myiman hkrum n mu ai aten ni hta grau nna ga shaga ma ai.

“Madaw jawn ai aten ni hta ga shaga byin ai. Myiman hkrum n re ai sha, makau kaw dung ai aten hta ga shaga na matu grau kaja ai.”​—Nihko.

Shat sha ai aten ni hta mung ga shaga loi chye ai.

“Shana shat sha ai aten hta, shani hta hkrum ai kaja ai lam, n kaja ai lam ni hpe tsun dan ai. Dai gaw zinlum shangun ai. Manghkang ai hpe marai langai sha hkrum nga ai n re ai hpe chye na shangun ai.”​—Rawbin.

Chyum Laika Npawt Tara: “Na la na matu lawan nga u ga; Ga tsun na matu hkum tin nga u ga.”​—Yaku 1:19.