Eenghundwa dashili ongeenge nye novana veni tamu lombwelafana omaliudo nosho yo omadiladilo.

Ohashi kala shidjuu okukundafana novanyasha unene tuu ovo ve li mepupi lokamukonda pweyu. Embo Breaking the Code ola ti, “ounona ohava lombwele ovadali vavo keshe shimwe ofimbo vanini, ndele eshi tava ende tava kulu ihave va lombwele vali oinima aishe. Novadali ihava kala vali ve shii kutya ovana vavo ove udite ngahelipi notava diladila shike.” Pefimbo opo ovana voye inava hala okupopya naave, olo efimbo wa pumbwa okupopya navo.

Kala we lilongekida, ngeenge okaana koye ka hala okupopya naave. Popya nako, nonande okwa toka.

Lisa okwa ti: “Luhapu ovadali ohava kala ve na eamo lokupopya kutya, ‘Paife opo wa hala okupopya, ame onda uhala efiku alishe naave!’ Inatu pumbwa okungongota, ngeenge ovana vetu va hala okupopya nafye. ”

Herbert okwa ti: “Ondi hole oku ka nangala kuyela, ndele luhapu ohandi kundafana novanyasha vange fiyo nokuli omokati koufiku.”

EFINAMHANGO LOMBIIBELI: “Inapa kala ou ta lalakanene ouwa waye mwene, ndele keshe umwe na lalakanene ouwa wamukwao.” — 1 Ovakorinto 10:24.

Ino efa u piyaanekwe. Xe omudali umwe okwa ti: “Ohandi lihange handi diladila kombinga yoinima imwe, ofimbo ovana vange tava popi naame. Nokape na omalimbililo, ohave shi didilike mo diva.

Ngeenge naave oho lihange meenghalo da fela oko, oshi li pandunge okukala ho dimi ko-TV noku tula po ongodi. Yandja elitulemo kwaasho okaana koye taka popi, ka udila oukwao wananghali, nonande osho taka popi otashi dulika shihe na oshilonga.

Maranda okwa ti: “Otu na okuulikila ovana vetu kutya omaliudo avo okwa fimana kufye. Ngeenge ova fiki pexulifodiladilo kutya omaliudo avo inaa fimanena kufye, itave ke e tu hololela.”

Anthony okwa ti: “Ino kenyanana, nonande onghedi omo ounona voye tava diladila oya puka.”

EFINAMHANGO LOMBIIBELI: “Pwilikineni nawa osho handi mu lombwele.” — Lukas 8:​18.

Longifa omhito oyo okaana ke ku mangulukila. Omafimbo amwe, ounona ohava kala va manguluka okupopya, ngeenge vehe li omutumba, inave litala oshipala noshipala.

Nicole okwa ti: “Ohatu mono shipu okupopya nounona vetu, ngeenge tu li motuwa. Ngeenge mu li omutumba monghedi oyo, ohava kala va manguluka okukundafana.”

Okulila pamwe nasho ohashi yeulula yo eemhito dokukundafana.

Robin okwa ti: “Pouvalelo, ohatu hokolelafana oinima iwa nosho yo ii oyo twa ningilwa momukokomoko wefiku. Onghedi oyo oye tu hanganifa noye tu kwafela tu mone kutya itatu ka taalela omaupyakadi kufye vene.”

EFINAMHANGO LOMBIIBELI: “Omunhu keshe na kale ha endelele okupwilikina, ne liteelele mokupopya.” — Jakob 1:​19.