YOVARETI
5: Euyungokumwe
EYI AYI TANTA
Euyungokumwe kuhoroka apa none novana veni omu litantere magazaro nomalizuvho geni.
EYI YA KARERA NOMULYO
Kuuyunga kumwe kuvhura kukara udigu unene po kovadinkantu. Buke Breaking the Code kwa tanta asi monomvhura da ka pita “ove wa divire nayinye eyi yina kuhoroka meparu lyovana woge. Nye ngesi kapi ono diva eyi yina kuhoroka meparu lyovana woge morwa vana kuru.” Nampili ngomu vana woge vana kudira kuuyunga ngwendi paapa va kere unona, nye ngesi yiso siruwo vanona vana hepa euyungokumwe unene!
EYI NO RUGANA
Diva siruwo sovana woge. Nampili yi kare asi mwa hepa kuzogera mokatji komasiku.
Lisa kwa tanta asi: “Kuvhura o hare kuuyunga asi: ‘Ruveze oru ntani ono kuhara kuuyunga ndi? Amesi nove katu kara ezuva nalinye!’ Nye morwasinke natu sivanena nsene vana vetu vana hara kututantera yuma? Nani oyo kapisi yiyo ga hara nkenye mureti, ndi ngapi?”
Herbert kwa tanta asi: “Na hara sili nompofu dange, nye nonzogera dimwe edi ani hafere deedi ani kara nado novana vange momasasiku.”
MPANGO ZOMOBIBELI: “Pwa ha kara ogu a kondjere uwa wamwene, nye a kondjere wamukwawo ntani.”—1 Vakolinte 10:24.
Funda po madonganeso. Guhya gumwe ga yi tambura asi: “Poyiruwo yimwe ame kugazara yininke yapeke apa vana vange ava uyunga name. Kapi to va kumbagere, tava yi dimburura!”
Nsene nove yimo ayi ku hokere ngoso, ya wapa kudimisa tivi nokutulira ntere yikwakonentu nayinye. Makura demenena kweyi ana hara kukutantera munoge ntani yi likida asi yinka yendi mulyo koge, nampili yi moneke ngwendi kwato mulyo.
Maranda kwa tanta asi: “Twa hepa kutantera vana vetu asi malizuvho gawo mulyo kwetu. Nsene kapi tuna kuvatantera, awo kapi ngava tu tantera maudigu gawo ntani ngava ka papara evatero kwapeke.”
Anthony kwa tanta asi: “Wa ha handuka, nampili eyi ana kukutantera munoge kapi yina kutanta yuma.”
MPANGO ZOMOBIBELI: “Omu takamese mokupurakena kweni.”—Rukasa 8:18.
Ruganesa nkenye mpito. Poyiruwo yimwe vanona kumanguruka kuuyunga novakondi vawo apa ava dili kulitara sipara nosipara.
Nicole kwa tanta asi: “Ose kuruganesa mpito apa atu zi netuwa tu ka hafere. Nzogera kutugenda po nawa novana vetu morwa kapi tuna litara yipara noyipara.”
Siruwo sokulya naso kuvhura kukara siruwo sosiwa kuzogera.
Robin kwa tanta asi: “Apa atu li murarero nkenye gumwe gwetu kusimwitira yininke yoyiwa neyi yoyidona eyi yina mu horokere mezuva. Eyi kutureta mouumwe ntani kuvatera nkenye gumwe gwetu a dive asi kapi ga hepa kulipungwira maudigu.”
MPANGO ZOMOBIBELI: ‘Nkenye muntu a genderere kuzuvha, nye mokuuuyunga ta liwora.’—Jakopo 1:19.
