Kushimutwila chamwenemwene chasakiwa visemi navana vavo kuhanjikanga omu vali nakwivwa kumichima novyo vali nakushinganyeka.

Vakweze veji kuchiwananga kupwa chachikalu kushimutwila navisemi javo. Chakutalilaho, omu vana venu vapwile vavandende vapwilenga nakumilweza vyuma vyosena kufuma kumuchima. Oloze omu vanakolo vanalitwamina kumilweza vyuma vali nakushinganyeka nomu vali nakwivwa. Echi chinafwane nge munemana musali yakalwiji, kaha mwanenu nawa nemana musali yikwavo. Shikaho, nge munaputuka kumona vyuma kana, kaha tachikizenu ngwenu kushimutwila navana venu chinakusakiwa chikuma.

Shimutwilenunga navana venu kala lwola navasaka mushimutwile. Wanenungako lwola lwakushimutwila navo numba nge kunatoko.

“Shimbu jimwe munahase kufwila kuhulisa mwanenu ngwenu: ‘Luno lwola lukiko uli nakusaka kuhanjika nayami tahi? Ngwetu twapwanga hamwe likumbi lyosena!’ Mwomwo ika katwatela kuyayavala nge vana vetu vanakasunuka kuhanjika nayetu? Uno evi keshi vikiko vasaka visemi kuli vana vavoko tahi?”—Lisa.

“Numba tuhu ngwazanga kusavala, oloze shimbu jimwe ngweji kushimutwilanga navana vami havyuma vyamwaza mukachi kaufuku.”—Herbert.

LUSHIMBI LWAMUMBIMBILIYA: “Mutu himutu kanda mwasakanga kulinganyalisa iveneko, oloze anganyalisenga vakwavo.”—Wavaka-Kolinde 1, 10:24.

Fwilenu kuhonesa vyuma navimitangula. Chisemi walunga umwe ambile ngwenyi: “Shimbu jimwe ngweji kushinganyekanga vyuma vyeka omu vana vami veji kushimutwilanga nayami. Chipwe ngocho, veji kutachikizanga ngwavo kangweshi nakuvevwilila kanawako.”

Nge omu mukiko chapwa nakuli yenu, kaha mwatela kujima TV namakina eka mweji kuzachisanga. Echi nachimikafwa mwivwililenga kanawa kuvyuma navahanjika vana venu nakusolola nge mwamona vyuma vali nakumilweza kupwa vyavilemu, chamokomoko nakala vyuma navamilweza.

“Twatela kulwezanga vana vetu ngwetu vishinganyeka vyavo vyapwa vyavilemu kuli etu. Nge katweshi kulinga ngochoko, kaha vanahase kumona nge katwavahaka manganako ngocho navafwila kulwezako mutu weka avakafwe.”—Maranda.

“Kamwatela kupihililanga washi navana venu nge vyuma vanakumilweza vyakuhenga.”—Anthony.

LUSHIMBI LWAMUMBIMBILIYA: “Nyingililenu omu mweji kwivwililanga.”—Luka 8:18.

Wanenunga lwola lwamwaza lwakushimutwila. Shimbu jimwe vana vanahase kukasunuka kuhanjika navisemi nge kaveshi nakuvatala hamesoko.

“Tweji kushimutwilanga navana vetu nge tuli muminyau. Kaha tweji kushimutwilanga kanawa kuhambakana nge tunalitale meso nameso.”—Nicole.

Kaha nawa lwola lwakulya lwapwa lwamwaza kushimutwila navana.

“Lwola kanelu tuvosena tweji kukasunukanga kuhanjika vyuma vyamwaza nevi vyavipi vyatusolokelanga. Echi cheji kutulingisanga tupwenga vakulinunga mutanga nakuhona kwechelela mutu akumise ukalu ukawenyi.”—Robin.

LUSHIMBI LWAMUMBIMBILIYA: ‘Anguhwenunga kwivwilila, nakushipwokela kuhanjika.’ —WaYakova 1:19.