Wuoyo e yo makare oriwo wuoyo gi nyithindi ka ginyisi pachgi kod kaka giwinjo to in bende iwachonegi pachi kod kaka iwinjo.

Wuoyo seche moko nyalo bedo matek gi nyithindo ahinya-ahinya sama gichako bedo joma dongo. Ka nyithindi ne pod tindo, ne ginyalo nyisi gimoro amora. Kata kamano, sama koro gichako bedo joma dongo ginyalo wuoyo kodi mana matin, kendo koro ok inyal ng’eyo kaka giwinjo. Nyalo chalo mana ka gima aora moro malach opogo kindu, ka in janyuol ichung’ koni, to nyathini ochung’ komachielo. Seche ma nenore ni nyithindi ok dwar wuoyoe kodino, e seche ma onego itemie matek mondo iwuo kodgi moloyo!

Ikri wuoyo sama nyathini be oikore wuoyo. Onego ibed moikore timo kamano kata bed ni nyathi dwaro ni owuo kodi chuny otieno.

“Seche moko inyalo bedo e tem mar wacho ne nyathini ni, ‘Koro eka idwa wuoyo koda to odiechieng’ duto ne wan mana kodi kae!’ Kata kamano, be onego watamre wuoyo ka mago e seche ma nyathi dwaro ni mondo oyawnwae chunye? Donge mano e gima janyuol moro amora digomb kuom nyathine?”​—Lisa.

“Ok ahero gima kethonaga nindo. Kata kamano, gima iwuoro en ni mbekni mabeyoe moloyo ma asebedogago gi nyithinda gin mbekni ma wagoyoga kodgi chuny otieno.”​—Herbert.

PUONJ MA MUMA CHIWO: “Kik ng’ato odwar mana gik ma kelone ber owuon, to odwar ma kelo ber ne ng’at machielo.”​—1 Jo-Korintho 10:24.

Kik iwe gimoro ogali. Wuoro moro wacho kama: “Seche moko ayudoga ka pacha tangni sama nyithinda wuoyo koda kendo ok anyal wuondora ni awinjogiga nikech gin bende gifwenyoga ni ok achikonegi ita!”

Ka di po ni TV, simu, kata gik ma kamago nyalo chochi, ber mondo iweri gi gigo sama iwuoyo gi nyithindi. Ket pachi kuom gimoro amora ma nyathini wacho kendo nyis ni idewo wechegego gadier kata bed ni owacho mana ang’o.

“Onego wakony nyithindwa mondo ging’e ni wadewo kaka giwinjo e chunygi. Ka gifwenyo ni ok wadewgi, ginyalo weyo wuoyo kodwa kendo ginyalo manyo kony kuma chielo.”​—Maranda.

“Kik iyi wang’ kata ka di po ni nyathini nyalo wacho ni wach moro ma ok kare.”​—Anthony.

PUONJ MA MUMA CHIWO: “Chikuru itu maber mondo uwinj gima iwachonu.”​—Luka 8:18.

Ikri wuoyo sama un e dije ma pile. Seche moko nyithindo bedoga thuolo wuoyo gi jonyuolgi kinde ma ne ok gichano mondo giwuo kodgi.

“Watiyoga gi thuolo e wuoyo gi nyithindwa sama wan e mtoka ka wadhi e wuoth. Wuoyo kodgi ka gin e bathwa osemiyo wabedo gi mbaka ma jaber moloyo ka wawuoyo kodgi ka wang’iyore wang’ gi wang’.”​—Nicole.

Unyalo yudo thuolo maber bende mar wuoyo sama uchiemo.

“Seche ma wachiemoga gotieno, ng’ato ka ng’ato wachoga gik mabeyo kod maricho ma notimorene odiechieng’no. Timo kamano osemiyo wabedo gi winjruok maber e kindwa kendo osemiyo ng’ato ka ng’ato ong’eyo ni ok ochuno ni onyagre gi pek ma okaloe kende.”​—Robin.

PUONJ MA MUMA CHIWO: “Bed ng’at ma winjo wach piyo, ma ok rikni e wuoyo.”​—Jakobo 1:19.