Qa ma tzʼel kypaʼn mambʼaj ambʼil tuʼn kyyolin kyukʼil kykʼwal, in nonin jlu tuʼn tbʼaj kychʼexpuʼn kyximbʼetz ex aju in kubʼ kynaʼn.

At maj kwest tuʼn kyyolin mambʼaj kyukʼil kykʼwal aj in che chʼiy. In tzaj tqʼamaʼn uʼj Tú no me escuchas, yo no te entiendo qa nya kwest tuʼn kyyolin mambʼaj kyukʼil kykʼwal akux in che chʼiy. Pero aj tbʼet ambʼil, jaku che ok mambʼaj ik tzeʼn alkyexku xjal qʼuqli kyxol txqantl ex jaku kubʼ kynaʼn qa mintiʼ in nok qʼoʼn kyoklen. Noqtzun tuʼnj, jaku qo el tzpet tuʼnju toj ambʼil lu, mas kyaj kʼwal tuʼn kyyolin kyukʼil kyman.

Yolina tukʼil tkʼwala. Bʼaʼn tuʼn tbʼant jlu tuʼna maske at maj yaj kxeʼla jtal.

«At maj jaku txi tqʼamaʼna jlu te tala: ‹Junx ma qo ten toj qʼij jaʼlo ex ¿kukx taja tuʼn tyolina?›. Pero ¿tzeʼn jaku txi tqʼamaʼna jlu te tala qa taj tuʼn tyolin tukʼila? ¿Nyapetzun a jlu kyaj mambʼaj tuʼn tbʼant kyuʼn kykʼwal?» (Lisa).

«Ngane tuʼn nxiʼye jtal lwey, pero aj nyoline kyukʼil nkʼwale, mas tbʼanel o tzʼela toj qwitze aj qyoline aj tok tmij aqʼbʼil» (Herbert).

NABʼIL TOJ TYOL DIOS: «Mya noq oʼkx tuʼn kyximane tiʼj ju bʼaʼn te kyeye, ax ikx tuʼn kyximane tiʼj alkyeju bʼaʼn kye txqantl» (1 Corintios 10:24).

Miʼn tzʼok tqʼoʼna twiʼya kyiʼj junjuntl tiʼchaq. In tzaj tqʼamaʼn jun mambʼaj jlu: «At maj, in chin ximane kyiʼj junjuntl tiʼchaq akux in che yolin nkʼwale wukʼile. Pero in nel kynikʼ kʼwal tiʼj jlu».

Qa ax jlu in bʼaj tiʼja, bʼaʼn tuʼn t-xi tyupina televisión ex qʼonkja jun rat tcelulara moqa alkyexku juntl tiʼ in bʼant tuʼna. Qʼonka twiʼya tiʼjju in tzaj tqʼamaʼn tkʼwala teya, iktzun tten kbʼel tyekʼina qa in ximana tiʼjju in bʼaj tkʼuʼj tiʼj. Maske nya nim kyoklen qe tiʼchaq toj twitza, pero il tiʼj tuʼn tok tqʼoʼna kyoklen.

«Nim toklen tuʼn tel kynikʼ qkʼwal tiʼj qa in qo ximen tiʼjju in kubʼ kynaʼn. Qa mintiʼ ma bʼant jlu quʼn, kyjunalx che jyol onbʼil tiʼj tzeʼn jaku che ex twitz jun nya bʼaʼn moqa che xeʼl jyol onbʼil tukʼil juntl xjal» (Maranda).

«Miʼn tzaj tqʼoja, axpe ikx aj ttzaj tqʼamaʼn tkʼwala jun tiʼ nya toj tumel teya» (Anthony).

NABʼIL TOJ TYOL DIOS: «Kyqʼoʼnke kwent tiʼj ju in kybʼiʼne» (Lucas 8:18).

Bʼaʼn tuʼn tajbʼen alkyexku ambʼil tuʼna. At maj, mas kyaj kuʼxun tuʼn kyyolin kyukʼil kyman toj jun ambʼil mas bʼaʼn toj kywitz.

«Aj qexe bʼetel, in najbʼen ambʼil quʼne tuʼn qyoline. Ex mas tbʼanel o tzʼok aj tkubʼ qeʼ jun ttxlaj juntl twitzju aj tkubʼ qeʼ jun twitz juntl. Tbʼanel jlu tuʼnju mas in qo yoline» (Nicole).

Ax ikx, tbʼanel qa ma che yoline kyukʼil kykʼwale akux in che wane.

«Akux in qo wane te qale, qkyaqilxe in xi qqʼamaʼne alkye nya bʼaʼn otoq tzikʼ qiʼje toj qʼij aju ex alkye mas tbʼanel otoq tzikʼ qiʼje. Tuʼnju in bʼant jlu quʼne, mas at mujbʼabʼil qxole ex in tzaj tnaʼn qeye qa nya qjunalxe atoʼye tuʼn qexe twitz jun nya bʼaʼn» (Robin).

NABʼIL TOJ TYOL DIOS: «Kykyaqile bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Santiago 1:19).