Kuthimutwiya mwamuvwa kwapwa kwendeka mu ngila yaivwa na vana veni.

Kuthimutwiya na vana kwatha kukaluwa manene. Vana veni muvapwile vavandondo vakele na kumileka vyuma vyoshe. Oloni muvanakolo vanechela kuthimutwiya neni thimbu yoshe, cho kumuthzivuka vithinganyeka vyavo nomu muvakalithzivila. Kunapu lika ngwe vamo vali muthambweli, vakwavo vali muthambwa lije lya ndonga. Nameme nga vana veni vasholoka ngwe kuvashaka kuthimutwiya neni, oloni munapande kuthimutwiya navo.

Thimutwiyeni na vana veni thimbu yoshe yoshe. Thimutwiyeni navo nameme vuthsiki.

Lisa ngwendi: “Ha kupwa chithemi, hamo mwatha kulithziva ngwe mushaka kukumbulula muneni ngweni, ‘Tunakala hamo mutanya woshe, yove na kwendeka kwahi. Ikeyo thimbu ya kuthimutwiya ino ndi?’ Kuma tunapande kuyayavala nga vana vashaka kuthimutwiya netu ndi? Vithemi vashaka ngwavo vana vavaleke muvali na kulithzivila.

Herbert ngwendi: “Njikashaka kulala vwathi, oloni tukathimutwiya vyuma vyavingi vya theho na vana vange hakati ka vuthsiki.”

CHINANGULO CHA MU MBIMBILIYA: “Naumo wahi napande kulishakethzekela vuvwa vwendi ikeye vavenya, oloni napande kuyongola vuvwa vwa vakwavo.”—1 Kolinte 10:24.

Kethi mwechelele vyuma vimitanganethe. Chithemi umo ngwendi: “Thimbu imo vana vange muvakanjileke vyuma vimo, yange njikathinganyeka vyuma vyeka lalo. Cho vakananguka ngwavo kunjethi na kuvatolilila.”

Nga TV nambe vyuma vyeka vikamitanganetha, cho vithzimeni nga muthimutwiya. Akeni mbunge ku vyuma vyamileka muneni, cho vimoneni kupwa vya theho nameme vinapu vyavindondo manene.

Maranda ngwendi: “Tunapande kuleka vana vetu ngwetu tushaka kuthzivuka muvakalithzivila. Nga vathinganyeka ngwavo kutwethi kwaka mbunge ku vyuma vivakatuleke, cho vanatha kulomba vukwathi ku vanu veka.”

Anthony ngwendi: “Kethi mutenukile muneni, nameme nathevuka.”

CHINANGULO CHA MU MBIMBILIYA: “Nyanyameni omwo mutolilila.”—Luka 8:18

Waneni mwakuthimutwiya na vana veni. Thimbu imo, vanike vakashuvuluka kuthimutwiya nga kuvalitalele mesho na mesho na vithemi vavo.

Nicole ngwendi: “Tukathimutwiya mwamuvwa nga tuli mu munyau mwafwa, kutwethi kulitala ku mesho.”

Thimbu ya kulya yapwa lalo thimbu yaivwa ya kuthimutwiya.

Robin ngwendi: “Ha thimbu ya kulya, munu na munu akendeka vyuma vyanaliwana navyo ha litangwa olyo. Kulinga ngocho kukatulingitha tupwe va kulikwatathana, cho kukatutakametha kuthzivuka ngwetu vakwetu vatha kutukwatha nga tuli mu vukalu.”

CHINANGULO CHA MU MBIMBILIYA: “Munu woshe napande kuthzambula kuthziva, oloni eshwale kukumbulula.”—Yakomba 1:19.