KULI MAKOLO
5: Kulaŵijana
VAMENE VUCHITIKA
Vinthu vuyenda luweme keno makolo ouja ŵana ŵawo vakufuna komasoti keno ŵana amene awo omasuka kuuja makolo vamuntima mwawo.
NDAŴA YANJI KUGANIZILA NKHANI YAMENE IYI N’KOFUNIKA?
Nthawe ziyakine makolo ovutika kulaŵijana momasuka na ŵana ŵawo achilumbwana. Buku iyakine yakuti, Breaking the Code inena kuti: “Ŵana akankhala atontho-atontho ouja makolo ŵawo chilichonse. Koma akokula, omasukalini kulaŵila vakufuna. Tetyo vunkhala vovuta kuti makolo aziŵe maganizo ŵawo.” Olo vingawoneke kuti ŵana amene awo omasukalini, ziŵani kuti akokula niye pamufunika kuyeja-yeja ngako kuti mukolaŵila nawo!
VAMUNGACHITE
Mukonkhala okonzeka kulaŵila nawo nthawe iliyonse. Mukonkhala okonzeka kulaŵila na ŵana ŵanu olo unkhale usiku ngako.
A Lisa enena kuti: “Nthawe ziyakine munganene kuti, ‘Ove ofuna kuti tikolaŵijana ino nthawe? Koma tenze pamozi nsiku yonse!’ Paliye chifukwa chilichonse chodandaulila keno mwana wamene uyo ofuna kulaŵila nase. Ndipo kansi ni vamene ivolini vatufuna sewo makolo?”
A Herbert enena kuti: “Newo nuyona mokulumija, koma nthawe ziyakine nutandala na ŵana ŵangu achilumbwana mpaka pakati pa usiku. Nuwona kuti ni voyavya.”
MFUNDO YA M’BAIBOLO: “Aliyense osati akolifunila vopindulisha yove yeka nkhela, koma vopindulishasoti muyake.”—1 Akorinto 10:24.
Osalola kuti chilichonse chikusokonezeni. Tata muyakine enena kuti: “Nthawe ziyakine ŵana ŵangu akolaŵila nane, maganizo ŵangu onkhala ali kuyakine—ove okwanisha kuwona kuti nuikilakolini nzelu!”
Keno mwewo musokonezewa na TV olo foni pa nthawe yakukulaŵijani mwana wanu, ni bwino kuizimwa. Mukoyeja-yeja kumvwishila vakulaŵila mwana wanu ndipo mukowonesha kuti muchita navo chidwi olo mungawone kuti ni vamasoŵela.
A Maranda enena kuti: “Tikoŵawonesha ŵana ŵasu kuti tuwona maganizo ŵawo kunkhala ofunika. Ove akawona kuti tiliye navo chidwi vakulaŵila angaleke kutiuja manganzio ŵawo ndipo angalute kuli munthu muyakine kuti akaŵayavye.”
Anthony enena kuti: “Osati mukoutukila kumukalipila mwana wanu olo keno mwawona kuti oganiza mophoniyeka.”
MFUNDO YA M’BAIBOLO: “Mukomvwishila mwatchelu ngako.”—Luka 8:18.
Mukofwana mipata yosiyana-siyana yolaŵijilana. Nthawe ziyakine ŵana omasuka kulaŵila va muntima mwawo keno mukambilana nawo monga mutandala.
A Nicole enena kuti: “Nthawe ziyakine tupanga tumaulwendo. Ndipo vuyenda luweme tikolaŵijana uku tufwamba.”
Nthawe ya chakulya yunkhalasoti iwene ngako kulaŵijana.
A Robin enena kuti: “Keno tikulya chakulya cha nchingulo aliyense ofotokoza vakumana navo nsiku yamene iyo. Vamene ivi vutiyavya kunkhala okatijana. Ndipo aliyense akakumana na vuto iliyonse oziŵa kuti nikafwika kung’anda, ayangu akaniyavye.”
MFUNDO YA M’BAIBOLO: “Munthu aliyense ankhale wokulumija kumvwa [koma] wodekha polaŵila.”—Yakobo 1:19.
Mungakondesoti kuwona izi
VAYUPHUNZISA BAIBOLO
Thandizo kuli achilumbwana
Ziŵani mwaingaŵayavyile achilumbwana Baibolo pa makonsho na mavuto ŵalinawo.
