VOKUNA OVANA
5: Tompholei
OTYO OTYITYI?
Okutomphola novana venyi oputyina amuho mulipopila ovipuka vienyi vyo komutima.
OITYI OTYIPUKA OTYO TYESUKISILA?
Pamwe tyipondola okupuiya okutomphola novana vekula-le. Omukanda umwe wati: ‘Puetyi ankho omona wove omututu, ankho ukupopila umwe ovipuka viae aviho. Mahi pahe netyi asoka, netyi tyili momutima wae, kutyii, kekupopila-tyo.’ Mahi muna okuhinangela okuti o pahetyino umwe ovana venyi vesukisa okutomphola.
OITYI UPONDOLA OKULINGA?
Yeka omona wove ekupopile ovipuka viae tyina muene ahanda. Pamwe mahande umwe okutyilinga mokati kovinthiki.
“Pamwe mohande okumupopila okuti: ‘Katuehimamene umwe atuho? O pahetyino umwe ñgaa uti tyatiwa wahanda tutomphole?’ Mahi katupondola okuvepopila onondaka ngo ombo mokonda atuho tuahanda ñgeno ovana vetu vetupopila ovipuka viavo.” — Lisa.
“Ame hihande okulangala-po eli lietaka. Mahi ovinyingi tuatomphaula novana vange, tuevitomphaula mokati kovinthiki.” — Herbert.
ONONDUNGE MBO MBIMBILIYA: “Kese umwe ahaovole ouwa wae muene, mahi aovole wa mukuavo.” — 1 Ova Kolindu 10:24.
Wahatalukwe. Omukulu umwe una ovana wati: “Pamwe tyina ovana vange vamphopila ovipuka viavo, ame kuno otyo ndyisoka kovipuka ovikwavo. Pamwe ndyililingisa ngoti ndyili nokuvetehelela etyi veli nokupopia, mahi navo vetyimona umwe okuti omutwe wange uli kokule.”
Ine pamwe no ove otyo uhole okulinga ngotyo, tyina ovana vove veli nokukupopila tyimwe, nyima o televisau, notelefone weheikwate. Tehelela umwe nawa etyi eli nokupopia, nankho umwe etyi eli nokupopia ngoti katyisilivila-le.
“Ovana vetu vena okutyinoñgonoka okuti onthwe tuesuka netyi vasoka, netyi tyili momitima viavo. Ine tulinga ngoti katuesukile-ale navo, kamavetupopila ovipuka viavo, okuti hatyo, pahe avakapopia vala novanthu vo kondye.” — Maranda.
“Ine pokutomphola omona wove ukupopila okuti wasoka, hamwe walinga otyipuka tyimwe tyehekahi nawa, wehemupopie.” — Anthony.
ONONDUNGE MBO MBIMBILIYA: “Talei nawa onkhalelo mutehelela.” — Luka 8:18.
Tompholei tyina muli nokulinga ovipuka ovikwavo. Pamwe ovana kavetyivili okutomphola novohe tyipumphi otyo velitala.
“Onthwe tutomphola vali novana vetu tyina tuli metuku-tuku. Mokonda metuku-tuku petupu ou utala motyipala tya mukuavo, tutyivila vali okutomphola.” — Nicole.
Tupu otyiwa okutomphola tyina muli nokulia.
“Tyina tuli nokulia kokangulohi, tutomphola ovipuka ovinyingi. Tupopia umwe evi tuahumba, nevi tuahahandele mokweenda kwonthiki. Omatompho etu etuwaneka vali kumwe, etuhinangelesa okuti apeho matulikuatesako.” — Robin.
ONONDUNGE MBO MBIMBILIYA: “Kese munthu, una okukanyauka okutehelela, mahi asete okupopia.” — Tiaku 1:19.
Hamwe Noove Uhanda
ETYI OMBIMBILIYA ILONGESA
Ovana Ovatutu N’ovakwendye N’ovahikwena
Tala etyi Ombimbiliya ipopia tyikwatesako ovakwendye movitateka vakala navio.
