Bzinthu bzimbafamba bwino abereki akambauza wana wawo bzomwe akufuna ndipo wanawo angakhale wakutsudzuka kufotokozera abereki wawo bza mu mtima mwawo.

Nthawe zinango abereki bzimbawanesa kuceza na wana wawo omwe ni maswaka. Bukhu linango limbalewa kuti: “Pomwe wana ali ang’ono ambauza abereki wawo ciri-centse comwe akufuna. Koma akakula ambakhala lini wakutsudzuka kulewa bzomwe ambafuna. Tenepo bzimbakhala bzakunesa kwa abereki kudziwa bzomwe wanawo akukumbuka mu mtima mwawo.” Napo bzingawoneke kuti wanawo akutsudzuka lini, dziwani kuti pomwe wanawo akukula ni pomwe mun’funika kumbaceza nawo kawiri-kawiri.—Breaking the Code.

Khalani wakukonzeka kumbaceza na wana wanu nthawe iri-yentse. Mbacitani bzimwebzo napo usiku.

Lisa adati: “Nthawe zinango mungalewe kuti, ‘Iwepo ukufuna kuceza na ine tsapanopayi? Tiribe kucoma pabobzi!’ Kodi tin’funika kumbadandaula wana wathu akambafuna kuceza nafe? Kodi aberekife timbafuna lini bzimwebzo?”

Herbert adati: “Ine nimbafuna lini kugona mwakucedwa. Koma maceza yabwino yomwe ndidakhala nayo na wana wangu yadakhala pakati pa usiku.”

NFUNDO YA M’BIBLIYA: ‘Munthu ali-wentse apitirize kunyang’ana, sikuti phindu la iye yekha basi, koma la winangombo.’—1 Wakolinto 10:24.

Lekani kubvuma kuviringiziwa na cinthu ciri-centse. Pai munango adati: “Nthawe zinango, pomwe wana wangu akulalewa nande, ine nimbakhala ndikukumbuka bzinango. Tsono wanawo ambawoneratu kuti ndikutetekera lini bzomwe iwo akulewa.”

Penu imwepo muli ninga pai omwe walewedwayu, mbathimani TV, foni yanu ayai tablet pomwe mukulewalewa na wana wanu. Mbakhalani tceru pomwe mwana wanu akulewalewa namwe ndipo latizanimbo kuti mukucita thupo na bzomwe iye akugumana nabzo. Citani bzimwebzi napo mukuwona kuti bzomwe akulewabzo bziribe basa.

Maranda adati: “Tin’funika kumbalatiza kuna wana wathu kuti bzomwe akulewabzo mpsakufunika kwa ifepano. Tikasaya kucita bzimwebzi, wana wathu an’dzatsudzuka lini nafe, ndipo iwo an’dzayenda kukakumbira thandizo wanthu winango.”

Anthony adati: “Lekani kumbakalipira wana wanu mwakamfulumize, napo mukawona kuti iwo akucita lini bzinthu bzakuzindikika.”

NFUNDO YA M’BIBLIYA: ‘Tetekerani mwatceru bzomwe mukubvabzi.’—Luka 8:18.

Mbakhalani na nthawe yakuceza na wana wanu. Nthawe zinango, maswaka yambawona kuti mpsakupusa kuceza na abereki wawo akakhala kuti ali lini nawo pafupi.

Nicole adati: “Tikakhala tiri mkaro tikuyenda ku mbuto inango, timbalokotera mpata umweyu kuti ticeze. Macezayo yambakhala yakudekeza kwene-kwene.”

Nthawe yakudya imbakhalambo yabwino kuti ticeze.

Robin adati: “Nthawe yakulalira ali-wentse ambakhala na mwayi wakufotokoza bzinthu bzabwino na bzakuipa bzomwe bzomucitikira pa ntsikuyo. Bzimwebzi bzimbatithandiza kukhala wakuphatana na kuwona kuti tin’funika lini kumbalimbana tekha na mabvuto.”

NFUNDO YA M’BIBLIYA: ‘Munthu ali-wentse akhale wakufulumiza kubva, wakucedwa kulewalewa.’—Tiyago 1:19.