Hem important for parents and olketa pikinini story gud tugeta, and storyim tingting and feeling bilong each other.

Staka parents faendem hem no isi for story witim pikinini taem hem kamap teenager. Taem olketa pikinini bilong iu smol olketa savve storyim evri samting long iu. Bat distaem, taem olketa teenager, olketa no laek story long iu and iu no savve gud long tingting and feeling bilong olketa. Hem olsem parents standap long wansaed long river and olketa teenager long narasaed. Nomata olsem, hem important for olketa teenager savve story gud witim iu.

Redi for story witim pikinini taem hem laekem. Willing for story nomata hem leit naet finis.

“Maet iu ting olsem, ‘Distaem nao iu laek story? Iumi stay tugeta full day nomoa!’ Iumi shud no komplen sapos pikinini laek storyim problem bilong hem witim iumi. Hem nao wanem evri parents laekem, iaman?”—Lisa.

“Mi savve laek sleep early, bat samfala taem, bihaen midolnaet nao hem taem wea teenage pikinini bilong mi savve story gud long mi.”—Herbert.

BIBLE PRINCIPLE: “Man mas no tingim hemseleva nomoa, bat hem mas tingim nara pipol tu.”—1 Corinth 10:24.

Lisin gud. Wanfala dadi sei: “Samfala taem, mi savve tingim olketa nara samting taem pikinini bilong mi story long mi. And olketa luksavve mi nating lisin gud long olketa!”

Taem olketa pikinini laek story witim iu, offem TV and leavim firstaem phone bilong iu. Lisin gud long wanem pikinini bilong iu talem, nomata maet iu tingse samting wea hem storyim hem no important.

“Iumi laekem olketa pikinini bilong iumi for savve wanem olketa talem and feeling bilong olketa hem important long iumi. Sapos olketa no savve long datwan, maet olketa bae les for story long iumi or askem narawan for helpem olketa.”—Maranda.

“Nomata tingting bilong pikinini bilong iu hem barava no stret, no kwiktaem for kros.”—Anthony.

BIBLE PRINCIPLE: “Iufala mas herehere gud.”—Luke 8:18.

Iusim evri chance for story long pikinini. Maet pikinini bilong iu willing for story witim iu taem iufala duim samting tugeta.

“Mifala iusim chance for story taem mifala travel long car. From mifala no feisim each other, pikinini bilong mi feel free for story long mi.”—Nicole.

Taem for kaikai tu hem chance for story witim pikinini.

“Mifala savve storyim eni gud samting and eni nogud samting wea happen long datfala day, long taem mifala kaikai long evening. From diswan, mifala luksavve sapos mifala feisim problem mifala savve helpem each other.”—Robin.

BIBLE PRINCIPLE: “Mas willing for lisin [and] no kwiktaem for toktok.”—James 1:19.