Ka tupu te karangaranga meitaki me akakite koe e taau tamariki i to kotou manako.

E ngata ana i te au mapu i te akakite mai i to ratou manako. Penei i mua ana ka akakite mai taau tamariki rikiriki i te au mea katoatoa tei tupu kia ratou. Teianei kua mapu ratou, kare ratou e akakite mai i tetai apinga e kare koe i kite eaa to roto i to ratou manako. Mei te mea atura e kauvai atea tetai i rotopu ia koe e taau tamariki. Noatu kare ratou e inangaro i te pukapuka, ko te taime tau teia i te karangaranga kia ratou!

Kia papa ua i te karangaranga. Kia rave i te reira noatu eaa te ora i te roa anga po.

“Penei te manako ra koe, ‘Ah, teia taime ka inangaro koe i te tuatua? I noo kapiti ana taua i teia rā katoa!’ Eaa tatou ka kopekope ei me te inangaro ra te tamariki i te akakite mai to ratou manako? Kare ainei ko tera ta te au metua e inangaro ra?”​—Lisa.

“E moe vave ana au, inara ko tetai au pukapuka anga reka ki taku tamariki mapu e raveia ana i muri ake i te turuaipo.”​—Herbert.

KAVEINGA PIPIRIA: “Auraka rava e tangata e kimi i tona uaorai meitaki, e kimi ra te tangata ravarai i to etai ke ra.”​—1 Korinetia 10:24.

Auraka kia apai ke ia toou manako. Akakite tetai metua tane: “Tetai taime, me tuatua mai taku tamariki kiaku, e apinga ke taku e akamanako ra i tera taime. Ka kite ratou e kare au i akarongo ana kia ratou!”

Me kua tupu ana teia kia koe, e tamate i taau TV e tetai ua atu apinga. Akarongo meitaki ki te tuatua a taau tamaiti, ma te akamou i toou manako ki te reira noatu i te akaraanga kare te reira i te mea puapinga kia koe.

“Ka akaari tatou ki ta tatou tamariki e e puapinga to ratou manako kia tatou. Me kare tatou e pera, kare ratou e akakite mai i to ratou manako e ka kimi ratou i te tauturu i tetai ngai ke”​—Maranda.

“Auraka e riri, me kare e tano ana te au manako o taau tamaiti.”​—Anthony.

KAVEINGA PIPIRIA: “E matakite i to kotou akarongo anga.”​—Luka 8:18.

Karangaranga i tetai ua atu taime. Tetai taime, e mama ake i te tamariki i te pukapuka mai me kare koe e noo tika ki mua ia ratou.

“E mataora ake ta matou pukapuka anga me aere na runga i te motoka no te mea kare e tangata e akara tika mai ia koe.”​—Nicole.

Ko te tuatau kaikai tetai atianga meitaki no te karangaranga.

“Me kaikai matou i te aiai, ka akakite matou tataki tai i te au mea kino e te mea meitaki tei tupu i tera rā. Kua taokotai teia ia matou ma te kite e me tupu te manamanata, ka tauturu matou i tetai e tetai.”​—Robin.

KAVEINGA PIPIRIA: “Kia rapurapu ua . . . i te akarongo, kia tavarevare i te tuatua.”​—Iakobo 1:19.