Кала и родителя и бэяцэ моӷут тэ дэн дума открыто, када и исин лащи дума.

Кала и бэяцэ подбарён, лэ родителёнэнди ашэл май ԥарэс тэ общяюца лэнца. Кала тумарэ бэяцэ сас цынёне, вонэ росԥэнэнас тумэнди вся. Но акана вонэ дэн дума тумэнца май набут и тумэ на ӷанэн, пала со вонэ гиндон и со лэндэ по ди. Но ворта андэ кадэя время, тумарэ бэятонэнди фартэ трэбуй, кай тумэ лэнца тэ дэн дума.

Вся и время ав ӷотово тэ виашунэс. Дэкала важ када трэбуй авэла тэ на досовэс.

«Дэкала кадя и камэлпэ тэ ԥэнав: „Значит акана ту камэс тэ подэс дума. Ай май раньшэ нащи сас? Мэ жэ цыло дес сымас паша тутэ!“ Но хэба можно тэ холявэс, кала о бэято камэл тэ росԥэнэн, со лэстэ по ди? Кажно дад и дэй када аштярэл» (Лиза).

«Мэ любисарав тэ пэрав тэ совав май рано, но часто бывает кадя, кай и бэяцэ андэ рят росԥэнэн, со лэндэ по ди» (Герберто).

БИБЛЕЙСКО ПРИНЦЫПО. «Мэк кажно родэл лашимос най важ пэстэ, ай важ авэр» (1 Коринфянам 10:24).

Драго виашун. Ек дад ԥэнэн: «Дэкала мэ полав, кай, кала и бэяцэ дэн дума манца, мэ лэн на ашунав и гиндосарав пала варисо пэско. Ай вонэ жэ вся диқэн, лэн на обхохавэса!»

Если ту полэс, кай терэс кадяжэ, тоди мудар о телевизоро и отстов пэстар о телефоно. Со бы во тэ на росԥэнэн, всаек шув сама по тиро бэято.

«Трэбуй тэ росԥэнас амарэ бэятонэнди, кай амэ камас тэ ӷанас, со лэндэ по ди, и кай амэнди када куч. Если на ласа кадя тэ терас, тоди вонэ парашэна тэ патян амэнди или мангэна помощь варикастэ аврэстэ» (Маранда).

«Ритяр пэс андэ вас, дажэ если о бэято, па тирятэ, росԥэнэн варисаво дилимос» (Энтони).

БИБЛЕЙСКО ПРИНЦЫПО. «Авэн внимательни каринг кода, сар тумэ ашунэн» (Луки 8:18).

Дэ дума, кала вмести варисо терэн. Чем тэ бэшэс и тэ роспушэс лэ бэятонэндар варисо, фэдэр тэ терэс лэнца ек дила. Тоди лэнди май вушэро авэла тэ росԥэнэн пала пэстэ.

«Амэ дас дума, сар ладас андэ машына. Кала бэшэс най напротив, ай паша лэстэ, о бэято май бут росԥэнэн, со лэстэ по ди» (Николь).

Инке сар можно тэ уӷанэс, со гиндой о бэято, када тэ подэс дума, кала вмести бэшэн тэ хан.

«Кала амэ бэшас тэ хас вэчэром, амэ вся и время росԥэнас, со лашо и найлашо тердяпэ амэндэ важ о дес. Када поможый амэнди инке май фартэ тэ авас ек пала еқэстэ и тэ полас, кай амэ най екжэнэ борисавас лэ ԥаримаса» (Робино).

БИБЛЕЙСКО ПРИНЦЫПО. «Кажно мануш трэбуй май йто тэ ашунэл, чем тэ дэл дума» (Иакова 1:19).