Ku bulisana lokunene ku va kone loko wene ni vanaku mi byelana leswi mi swi pimisaka ni ndlela leyi mi titwaka ha yone.

Swi nga ha voneka swi nga nabyali ku bulisana ni vana lava nga malembeni ya wumpswha. Loko vanaku va ha li vatsrongo a va ku byela xin’wana ni xin’wana. Kambe leswi kutani va nga malembeni ya wumpswha, a va ha li tanu naswone a wa ha yi tivi ndlela leyi va titwaka ha yone. Swi fana ni loko va yime ka tlhelo dzrin’wana dzra nambu lowukulu na kuve wene u yime ka tlhelo ledzrin’wana. Nambiloko va nga ha swi nyonxeli ku hlaya ndlela leyi va titwaka ha yone, tinyike nkama wa ku bulisana na vone!

Tinyike nkama loko n’wanaku a djula ku bula na wene. Bulisana na yene nambiloko a djula mi bula wusikwini.

“U nga ha dzringisa ku: ‘U djula ku bula na mine hi nkama waku ha swoo, kasi a hi nga li xikan’we siku hinkwadzru?’ A hi fanelanga ku ngurangura loko vana va djula ku bulisana na hine. Vapswali va nyonxa loko va bulisana ni vana vavu”​—Lisa

“Ni zrandzra ku hantla ni yetlela, kambe a wusikwini hi kone lani ni bulisanaka ha hombe ni vananga.”​—Herbert.

NSINYA WA NAWU WA BIBELE: “A mhunu a nga tidjulele swakwe ntsena, kambe mhunu mun’wana ni mun’wana a a djulele va’nwana leswi va fanelaka.”​—1 Ba-le-Korinte 10:24.

U nga pfumeli ku hingeletiwa. Tatana mun’we a pfumela leswi: “Minkama yimbeni ni pfa ni pimisa hi swimbeni loko vananga va bulisana na mine. Nakone va swi xiya, loko ni li na vone na ni pimisa hi swimbeni”

U nga pfumeli ku hingeletiwa hi televhizawu ni switizrisiwa swimbeni swa eletroniku. Yingiseta loko n’wanaku a bula na wene nakone u teka mhaka yakwe yi li ya lisima nambiloko yi nge ya lisima ka wene.

“Hi fanela ku komba vanezru leswaku ndlela leyi va titwaka ha yone i ya lisima ka hine. Loko hi nga yentxi leswo, a va nge ti hi byela leswi swi va kazrataka nakone va ta djula mpfuno ka vhanu vambeni.”​—Maranda

“U nga hlundzruki loko n’wanaku a hlaya mintxhumu leyi hoxekiki.”​—Anthony

SINYA WA NAWU WA BIBELE: ‘Tivonelani ke ku mayingelela yenu.’​—Luka 8:18.

Tizrisa nkama lowutsrongo lowu u wu kumaka. Minkama yimbeni a vana swa va nabyalela ku hlaya leswi swi va kazrataka loko va li ku hungateni ni vapswali vavu.

“Hi bulisana na vone loko hi famba hi movha. Swa nabyala ku bulisana na vone hi ndlela leyinene loko hi li movheni swanga heswi hinkwezru hi langusiki lomu hi yaka kone.”​—Nicole

Nkama wa ku da i nkama wumbeni lowu mi nga bulisanaka ha wone.

“Loko hi li ku deni a wusikwini, hi bula hi leswi swi hi kazratiki ni leswi swi nga hi nyonxisa hi siku ledzro. Leswo swi yentxa leswaku hi va ni wumun’we nakone swi yentxa leswaku mun’wana ni mun’wana wezru a swi vona leswaku a nge swi koti ku langusana ni swikazratu yene wuswake.”​—Robin

NSINYA WA NAWU WA BIBELE: “A mhunu mun’wana ni mun’wana a a hangweyese ku yingela, a hlwela ku vulavula.”​—Yakob 1:19.