Kucedza kwadidi ndi kule kwakuti anyakubala asapanga anawo pinthu pinafuna iwo, pontho ana asakhala akusudzuka toera kupanga anyakubalawo pinanyerezera iwo na mabvero awo.

Midzidzi inango anyakubala asanentseka kakamwe toera kucedza na anawo angathuthuka. Bukhu yakuti Breaking the Code yalonga: “Ana angakhala ang’ono asapanga anyakubalawo pinthu pyonsene. Mbwenye angathutuka nee asakhala akusudzuka toera kupanga anyakubalawo pinafuna iwo. Natenepa pisakhala pyakunentsa kuna anyakubala toera kudziwa pinanyerezera anawo.” Maseze ananu akhonde khala akusudzuka, dziwani kuti unoyu ndi ndzidzi unafunika imwe kuwangisira kakamwe toera kucedza nawo.

Khalani dzololo toera kucedza na ananu ndzidzi onsene. Cedzani nawo maseze kukhale namasiku.

“Panango imwe munanyerezera: ‘Usafuna kucedza na ine ndzidzi uno, ukhali kupi ntsiku yonsene?’ Kodi tisafunikadi kudungunya anathu angafuna kucedza na ife? Kodi si pyenepi tayu pinafuna anyakubala?”—Lisa.

“Kazinji kene ine ndisagona nakweru, mbwenye midzidzi inango ananga asafuna kuti ticedze mpaka tcititciti. Pyenepi pisaaphedza.”—Herbert.

PINALONGA BHIBHLYA: “Natenepa m’bodzi na m’bodzi mbapitirize kucita pinthu pinakomeresa ndzace, tayu pinakomerwa na iye basi.”—1 Akorinto 10:24.

Lekani kudzudzumiswa na pinthu pinango. Baba m’bodzi alonga: “Midzidzi inango ananga angalonga ine ndisanyerezera pinango m’mbuto mwakubvesera pinalonga iwo. Mbwenye iwo asakwanisa kudzindikira kuti ine nee ndiri kuabvesera munjira yadidi.”

Khala pinakucitisani kuti mukhonde kubvesera mwadidi mwananu angalonga ndi Televizau peno ntokodzi, tomani kusiya pakhundu ntokodzi wanu peno thimisani Televizau. Bveserani mwadidi pinalonga mwananu, pontho pangizani kuti musatsalakana mabvero ace maseze pinalonga iye pikhale pyakukhonda funika maka.

“Tisafunika kupasa cinyindiro anathu kuti mabvero awo ndi akufunika kakamwe kuna ife. Iwo angadzindikira kuti ife nee tisatsalakana pinalonga iwo, nee anatipangabve mabvero awo peno anenda kasaka ciphedzo kuna anthu anango.”—Maranda.

“Lekani kucimbiza na kupwekera mwananu, maseze muone kuti manyerezero ace ndi akuphonyeka.”—Anthony.

PINALONGA BHIBHLYA: “Musafunika kubvesera mwadidi.”—Luka 8:18.

Sakani miyai yakusiyana-siyana toera kucedza. Midzidzi inango ana asakhala akusudzuka toera kulonga piri muntima mwawo mungalonga nawo ninga muli kucedza.

“Ife tisabandza mwai wakucedza na anathu mu ndzidzi unacita ife ulendo na karu kuenda ku mbuto inango. Kucedza nkaru kusatiphedza toera kukhala akusudzuka m’mbuto mwakuyang’anisana nkhope na nkhope.”—Nicole.

Ndzidzi wakudya ndi wadidi pontho toera kucedza.

“Pa ndzidzi wakudya namasiku m’bodzi na m’bodzi asalonga pinthu pyadidi na pyakuipa pidancitikira pa ntsiku ineyi. Pyenepi pisatiphedza toera tikhale anthu akubverana, pontho pisacitisa m’bodzi na m’bodzi wa ife kudziwa kuti nyatwa zidathimbana na ine lero ndingafika kunyumba ndinaphedzwa.”—Robin.

PINALONGA BHIBHLYA: ‘Munthu asafunika kukhala wakucimbiza kubva na wakudembuka kulonga.’—Tiyago 1:19.