E maua fesootaʻiga lelei pe a fefaasoaaʻi manatu ma faalogona o mātua ma fanau.

E matuā faigatā le iai o ni fesootaʻiga aemaise lava pe a oo i le tulaga talavou. A o laʻitiiti lau tama sa nanau o ia e taʻu atu iā te oe mea uma, ae a o tuputupu aʻe ma avea o se talavou e na te lē o toe taʻuina atu le tele o mea ma faigatā ai ona e iloa ona manatu ma faalogona. E tai pei o loo oulua tutū i itu uma e lua o le vaitafe. O lea, e tusa lava pe foliga mai e lē fia talanoa lau tama, peitaʻi o le taimi lenā e manaʻomia ai ni fesootaʻiga lelei.

Nofosauni e talanoa atu. Ia faia faapea e tusa lava po o ni talanoaga e faia i le leva o le po.

“Atonu e te ono fai atu ʻUa leva ona e nofo i le aso atoa a o lea faatoʻā e fia talanoa mai!’ Ae aiseā tatou te faitio ai pe afai o lea ua fia talanoa mai le fanau? Pe e lē o le mea lenā e tatou te mananaʻo i ai?”​—Lisa.

“E ui lava ou te fia vave moe i le po, ae o nisi talanoaga pito sili ona lelei na ou maua ma laʻu fanau talavou sa faia i le vaeluapō.”​—Herbert.

MATAUPU SILISILI FAALE-TUSI PAIA: “Aua neʻi saʻilia e se tasi lona lava lelei, a ia faaauau ona saʻili le lelei o isi.”​—1 Korinito 10:24.

ʻAlofia mea e ono faalavelave mai. Ua taʻutino mai e se tamā: “O nisi taimi pe a talanoa mai tamaiti e ese le mea o loo alu iai loʻu mafaufau, ma e latou te iloa lelei ou te lē o uaʻi atu iā i latou.”

Pe afai e avea le TV po o masini faaonapōnei ma faalavelave iā te oe, ia tapē pe aveese. Ia uaʻi atu i mea o loo fai mai ai lau tama ma ona manaʻoga, ma ia faatāua ona popolega e tusa lava pe foliga mai o se mataupu itiiti.

“E manaʻomia ona faamautinoa atu i ā tatou fanau e tāua o latou faalogona iā i tatou. Pe afai e latou te manatu e lē tāua o latou faalogona iā i tatou, o le a latou lē faailoa mai foʻi la o latou faalogona pe saʻili atu foʻi i isi mo se fesoasoani.”​—Maranda.

“Aua le soona mateletele pe a lē saʻo manatu o le tamaitiiti.”​—Anthony.

MATAUPU SILISILI FAALE-TUSI PAIA: “Ia uaʻi atu i la outou faalogo.”​—Luka 8:18.

Faaaogā tatau talanoaga faasamasamanoa. I nisi taimi e sili atu le faigofie i fanau ona talanoa i mātua pe a lē faafesagaʻi.

“E ma te faaaogā tatau le taimi pe a ō faatasi i le taavale. O le ō faatasi i le taavale nai lo o le talanoa faafesagaʻi, na iʻu atu ai i ni talanoaga lelei.”​—Nicole.

O le taimi o taumafataga o le isi taimi lelei lenā e talatalanoa ai.

“I taimi o taumafataga e faamatala ai e tagata taʻitoʻatasi mea e pito sili ona leaga na tutupu faapea mea e pito sili ona lelei na tutupu i lenā aso. O le faia faapea e maua ai le autasi ma iloa ai e lē na o oe o loo fesagaʻia na faafitauli.”​—Robin.

MATAUPU SILISILI FAALE-TUSI PAIA: “Ia faalogologo lelei . . . ae aua le vave ona tautala.”​—Iakopo 1:19.